ABŞ dövlət katibi Marko Rubio 13–18 sentyabr tarixlərində İsrail və Böyük Britaniyaya səfər edəcək.
Musavat.com xəbər verir ki, bu barədə ABŞ Dövlət Departamenti məlumat yayıb.
İsraildə Rubio ABŞ-ın İsrail ilə HƏMAS arasında davam edən münaqişədəki prioritetlərini və Yaxın Şərqdə təhlükəsizlik məsələlərini müzakirə edəcək. O, ABŞ-ın İsrailin təhlükəsizliyinə sadiqliyini bir daha təsdiqləyəcək və aşağıdakı əsas məqsədləri vurğulayacaq:
HƏMAS-ın Qəzzaya qayıtmasının qarşısının alınması,
Bütün girovların evlərinə qaytarılması.
Dövlət katibi İsrail liderləri ilə “Gideonun Arabaları II” əməliyyatı çərçivəsində İsrailin operativ məqsəd və vəzifələrini müzakirə edəcək, həmçinin anti-israil addımlara qarşı ABŞ-ın mövqeyini təsdiqləyəcək. Buraya HƏMAS terrorizmini dəstəkləyən birtərəfli Fələstin dövlətinin tanınmasına qarşı çıxmaq və BMT Beynəlxalq Cinayət Məhkəməsinin mövqeyi daxildir.
Rubio girovların ailələri ilə də görüşəcək və onların azadlığının ABŞ üçün əsas prioritet olduğunu vurğulayacaq.
İsrail səfərindən sonra Rubio ABŞ prezidentinin ikinci dövlət səfərində iştirak etmək üçün Böyük Britaniyaya yollanacaq. Orada o, xarici işlər naziri İvet Kuperlə görüşəcək. Tərəflər ABŞ-Böyük Britaniya əməkdaşlığını aşağıdakı qlobal məsələlər üzrə müzakirə edəcəklər:
Rusiya-Ukrayna müharibəsinin dayandırılması,
İranın nüvə silahı əldə etməsinin qarşısının alınması,
HƏMAS-ın saxladığı bütün girovların azad olunması və Qəzzada atəşkəs,
Çinlə rəqabət.
Musavat.com
