"Qərbin zəif reaksiyası Kreml üçün fürsətə çevrilir..."
ABŞ prezidenti Donald Tramp Böyük Britaniyaya səfəri öncəsi Ukrayna mövzusunda mühüm açıqlamalar verib. Onun sözlərinə görə, Vladimir Zelenski nəticədə Rusiya ilə atəşkəs sazişinə getməyə məcbur olacaq.
Moderator.az xəbər verir ki, bu barədə "rbc.ua" nəşri yazıb.
"Zelenski və Putin bir-birinə nifrət edir. Görünür, onların yanında oturub vasitəçilik etməli olacağam", - Tramp bildirib. Amerika lideri həmçinin Avropanı sərt tənqid edərək, Rusiyadan neft almağı dayandırmağa çağırıb. Onun fikrincə, Qərb Moskva ilə iqtisadi əlaqələrini davam etdirdiyi müddətdə Vaşinqtondan əlavə sanksiya gözləmək ədalətsizlikdir. Tramp ilk dəfə açıq şəkildə Rusiyanı bu müharibədə "təcavüzkar" adlandıraraq öz mövqeyində mühüm dəyişiklik olduğunu göstərib. O, həm də Avropaya mesaj verərək bildirib ki, ABŞ təkbaşına Ukraynaya dəstək yükünü çəkmək istəmir.
Moskva və Minskdən təhlükəli siqnal
Bu açıqlamalar fonunda Belarusda keçirilən birgə "Qərb-2025" təlimləri Şərqi Avropa üçün ciddi narahatlıq doğurub. Müharibənin başlanmasından bəri ilk dəfə Rusiya və Belarus bu miqyasda manevrlər həyata keçirir. Təlimlər zamanı Polşa üzərində dronların uçuşu, Rumıniya hava məkanının pozulması və Kreml tərəfindən nüvə sınaqlarına dair açıqlamalar Qərbi birbaşa hədəfə alma mesajı kimi qiymətləndirilir.
Ukraynalı veteran və analitik Yevgeni Dikiyə görə, bu manevrlərin əsas məqsədi Qərbi qorxutmaq və NATO-nun hazırkı zəifliyini sınaqdan keçirməkdir. Onun sözlərinə görə, Kremlin siqnalı aydındır: Moskva yalnız Ukrayna ilə kifayətlənməyəcək, Baltikyanı ölkələr və Polşa da potensial hədəflərdir. Dikiy əlavə edib ki, Tramp administrasiyası açıq şəkildə Moskvanı və Lukaşenkonu beynəlxalq təcriddən çıxarmağa çalışır. ABŞ nümayəndələrinin müşahidəçi qismində bu təlimlərdə iştirakı da Qərbin zəif mövqeyinin bir göstəricisi kimi qəbul edilir.
Putinin üç mümkün ssenarisi
Almaniyanın "Bild" nəşri isə xəbərdarlıq edir ki, təlimlərdə toplanan 30 minlik Rusiya kontingenti yaxın aylarda müxtəlif istiqamətlərdə istifadə oluna bilər. Analitiklərin fikrincə, Kremlin qarşısında üç əsas ssenari var:
- Qoşunların Belarusda qalaraq Qərb üçün daimi təhdidə çevrilməsi;
- Ukraynaya şimal istiqamətindən yeni hücum;
- Belarus sərhədinə diqqəti cəmləyərək başqa bir bölgədə gözlənilməz zərbə endirmək.
Ekspertlər xatırladır ki, 2021-ci ildə keçirilən analoji təlimlərdən dərhal sonra Rusiya Ukraynaya genişmiqyaslı işğala başlamışdı. Buna görə də bu dəfə də risklərin böyük olduğu vurğulanır.
Qərbin dilemması
Hazırkı mənzərə göstərir ki, Tramp administrasiyası Şərqi Avropaya hərbi zəmanət verməkdə tərəddüd edir. Bu isə Kremlin mövqeyini gücləndirir, NATO-nun isə zəif görüntü yaratmasına səbəb olur. Ukrayna mütəxəssislərinin fikrincə, Qərb Rusiyanın bu strategiyasına qarşı daha sərt mövqe tutmasa, "Qərb-2025" təlimləri yalnız başlanğıc olacaq. Putinin qarşısındakı ssenarilərdən hansını seçəcəyi isə yaxın aylarda müharibənin istiqamətini müəyyən edəcək.
