ain.az bildirir, Bizimyol saytına əsaslanaraq.
2003-cü ildən başlayaraq Prezident İlham Əliyev tərəfindən irəli sürülən “Regionların sosial-iqtisadi inkişafı Dövlət Proqramları” regionlarımızda infrastrukturun yenilənməsi, yeni iş yerlərinin açılması ilə əhalinin məşğulluğunun təmin edilməsi, yeni səhiyyə və təhsil müəssisələri, mədəniyyət ocaqlarının inşa edilməsi, turizmin inkişafı üçün münbit şərait yaradılması və s. istiqamətlərdə sürətli inkişafa səbəb olub. Sosial-iqtisadi proses daimi xarakter daşıdığından işlər bu gün də uğurla davam etdirilir. Qarabağın işğaldan azad edilməsi ilə sosial-iqtisadi inkişaf yeni mərhələyə qədəm qoyub.
Prezident İlham Əliyevin Qarabağ və Şərqi Zəngəzur iqtisadi rayonlarına mütəmadi səfərləri işğaldan azad olunmuş regionların sosial-iqtisadi inkişafına təkan verməklə yanaşı, aparılan işlərlə yerində tanış olmaq baxımından da mühüm əhəmiyyət daşıyır. Dövlət başçısının hər səfərində yeni obyektlərin açılışı və təməlqoyma mərasimləri baş tutur. Bu səfərlər bölgələrin yüksəlişinin davamlı sosial-iqtisadi inkişaf strategiyasının mühüm tərkib hissəsi olduğunu bir daha təsdiqləyir. Digər tərəfdən, regionların inkişafı üçün uğurla reallaşdırılan dövlət proqramları ölkədə qeyri-neft sektorunun davamlı artımına, sahibkarlıq mühitinin daha da yaxşılaşdırılmasına, yeni iş yerlərinin açılmasına, nəticədə əhalinin məşğulluğunun təmin olunmasına təkan verir. Bir sözlə, bu səfərlərin hər biri doğma torpaqlarımızın çiçəklənməsi, azad edilmiş ərazilərin potensial imkanlarından səmərəli istifadə olunması istiqamətində tarixi hadisəyə çevrilir.
Hazırda həyata keçirilən “Böyük Qayıdış” Proqramı yalnız məcburi köçkünlərin doğma yurdlarına qayıdışı deyil, həm də bölgənin sosial-iqtisadi reabilitasiyası, milli birliyin möhkəmləndirilməsi və tarixi ədalətin bərpasıdır. 2026-cı ilin sonunadək 140 min vətəndaşın Qarabağ və Şərqi Zəngəzura köçürülməsi planlaşdırılır ki, bu da Azərbaycanın iqtisadi gücü, sosial planlaşdırma imkanları və siyasi iradəsinin bariz göstəricisidir.
Bu günlərdə Prezident İlham Əliyevin Xocalı, Xankəndi, Xocavənd və Füzuliyə səfəri bir daha göstərdi ki, Böyük Qayıdış proqramı çərçivəsində həyata keçirilən məqsədyönlü tədbirlər, genişmiqyaslı quruculuq işləri artıq öz real nəticələrini verməkdədir. Qarabağ və Şərqi Zəngəzur iqtisadi rayonlarında tikinti və infrastruktur layihələrinin ardıcıl və uğurlu icrası bölgələrin sürətlə dirçəlməsinə və həyatın yenidən canlanmasına zəmin yaradır.
Azad edilmiş ərazilərdə inşa olunan müasir şəhərlər, “ağıllı” kənd konsepsiyası, yollar, tunellər, elektrik stansiyaları, hava limanları və digər obyektlər Azərbaycanın siyasi-iqtisadi qüdrətinin təcəssümüdür. Cəmi bir neçə il ərzində Füzuli, Zəngilan və Laçın beynəlxalq hava limanlarının istifadəyə verilməsi, yüzlərlə kilometr uzunluğunda magistral yolların və dəmir yollarının tikilməsi dövlətimizin siyasi iradəsini və iqtisadi gücünü nümayiş etdirir. Şuşa, Xankəndi və Laçın kimi şəhərlərdə beynəlxalq əhəmiyyətli tədbirlərin keçirilməsi isə regionun mədəni-siyasi mərkəz kimi qlobal arenada tanınmasına xidmət edir.
Səfər çərçivəsində Prezident İlham Əliyev Füzuli rayonunun Qaraxanbəyli kəndinin təməlini qoydu. Hadrutda məscidin, Xankəndidə isə Qarabağ Universiteti Klinikasının və Tibb fakültəsinin yeni tədris korpusunun açılışı baş tutdu. Prezident həmçinin Xocavəndin Qırmızı Bazar, Hadrut və Sos qəsəbələrində, eləcə də Xocalının Badara, Daşbulaq, Seyidbəyli və Şuşakənd kəndlərində aparılan işlərlə yerində tanış oldu. Ölkə rəhbərinin sakinlərlə səmimi görüşləri, onların qayğı və təkliflərini diqqətlə dinləməsi dövlətin xalqına göstərdiyi qayğının ən parlaq nümunəsidir. Bu ünsiyyət təkcə problemlərin həlli üçün deyil, həm də vətəndaşlarda gələcəyə inamın və ruh yüksəkliyinin möhkəmlənməsi üçün olduqca əhəmiyyətlidir.
Xankəndidə məskunlaşma prosesinin sürətli şəkildə aparılması və şəhərin elm-təhsil mərkəzinə çevrilməsi, Xocalıda sakinlərinin ata-baba yurdlarına dönüşü Azərbaycanın ədalətin bərpa olunması uğrunda apardığı siyasətinin təntənəsidir. Burada aparılan bərpa işləri yalnız fiziki infrastrukturun deyil, həm də milli yaddaşın və mənəvi dəyərlərin dirçəldilməsinə xidmət edir.
Hazırda azad edilmiş ərazilərdə 50 minə yaxın insan yaşayır, çalışır və təhsil alır. Bu bölgələrdə dövlət qurumlarının yerli nümayəndəlikləri fəaliyyət göstərir, müəllimlər, həkimlər, mühəndislər, sahibkarlar və turizm işçiləri artıq öz fəaliyyətlərinə başlayıblar. Bu məskunlaşma və inkişaf strategiyası Azərbaycanın gələcək üçün yaratdığı sabitlik, sosial ədalət və vətəndaş rifahı modelinin bir parçasıdır.
Prezident İlham Əliyevin qətiyyətli siyasəti və həyata keçirilən praktiki işlər dünya ictimaiyyətinə nümayiş etdirir ki, Azərbaycan yalnız döyüş meydanında deyil, həm də iqtisadi inkişaf və quruculuqda böyük uğurlar əldə edir. Prezident İlham Əliyevin “Biz Qarabağı və Şərqi Zəngəzuru cənnətə çevirəcəyik” ifadəsi artıq reallıqda öz əməli təsdiqini tapmaqdadır. Dövlət başçısının düşünülmüş inkişaf strategiyası nəticəsində Qarabağ və Şərqi Zəngəzur yaxın gələcəkdə təkcə Azərbaycanın deyil, bütün regionun dayanıqlı inkişafının aparıcı mərkəzinə çevriləcək.
Cavanşir Feyziyev, Milli Məclisin deputatı
17 sentyabr 2025
Sonrakı hadisələr barədə daha çox məlumat almaq üçün ain.az saytını izləyin.
