Norris Azərbaycan Qran Prisinin ilk məşqində Piastriyə üstünlük qazandı
Ajans.az xəbər verir ki,bu məlumatı BBC paylaşıb. Lando Norris sessiyanın lideri olub, komanda yoldaşı Oskar Piastri isə ikinci nəticə ilə onun ardınca qərarlaşıb. Bu nəticə Ferrari pilotu Çarlz Lekler və Mercedes sürücüsü Corc Rasselin üçüncü və dördüncü yerləri tutmasına baxmayaraq, hadisələrlə dolu sessiyanın real mənzərəsini əks etdirmirdi. Sessiya bir neçə dəfə insidentlər səbəbindən pozulub. Yarışın gedişində 16-cı döngədə bordürün altından rezin zolağının çıxması nəticəsində sessiya təxminən 20 dəqiqə qırmızı bayraqla dayandırılıb. Bu fasilə McLaren komandasına Piastrinin avtomobilində aşkarlanan güc aqreqatı (mühərrik) problemi ilə bağlı müdaxilə etmək üçün vaxt qazandırıb və mümkün texniki zərərin qarşısı alınıb. Mercedes pilotu Lyuis Həmilton isə sessiya ərzində çətin anlar yaşayıb. 3-cü döngədə bordürü düzgün qiymətləndirməyərək divara çırpılıb, nəticədə ön qanadı zədələnib və sessiyanı yalnız 12-ci yerdə tamamlayıb. O, komanda yoldaşı Rasseldən 0,831 saniyə geridə qalıb. Red Bull pilotu Maks Ferstappen də riskli məqamlardan qaça bilməyib. Sessiyanın sonlarında sürətli dövrə cəhdi zamanı 15-ci döngədə təkərləri kilidləyərək trasdan çıxmalı olub və nəticədə yalnız yeddinci nəticəni göstərib. O, Williams-dan Aleks Albon və Red Bull-un digər pilotu, Yuki Tsunodanı qabaqlayıb. Ferrari pilotu Karlos Sayns isə 16-cı döngədə bordür altındakı rezini yerindən çıxaran insidentin əsas iştirakçılarından biri olub. O, sessiyanı səkkizinci sırada başa vurub, Racing Bulls pilotları Liam Lawson və İsak Hacarı qabaqlayıb. Statistik göstəricilərə görə, Norris komanda yoldaşından 0,310 saniyə sürətli olub, Lekler isə britaniyalı sürücüdən 0,552 saniyə geridə qalıb. Piastri isə cəmi 13 dövrə vuraraq texniki çətinliklərə baxmayaraq, ikinci yeri qorumağı bacarıb. Qeyd edək ki, hazırda çempionatda Piastri Norrisdən 31 xal öndədir.
