Qaynarinfo portalından alınan məlumata görə, ain.az xəbər verir.
Barəsində cinayət işi açılan Mədəniyyət Nazirliyinin Qara Qarayev adına Mərkəzi İncəsənət Məktəbinin sabiq direktoru Əziz Yaşar oğlu Qarayusifliyə hökm oxunub.
Qaynarinfo-nun məlumatına görə, Əziz Qarayusiflinin Cinayət Məcəlləsinin 179.2.3, 179.2.4, 308.1 və 313-cü maddələri ilə təqsirləndirilməsinə dair cinayət işinə məhkəmədə baxılıb.
Aparılan araşdırma zamanı sabiq direktorun ümumilikdə 43.030,60 manat məbləğində pulu qulluq mövqeyindən istifadə etməklə mənimsədiyi məlum olub. İstintaq dövründə o da məlum olub ki, dövlət büdcəsinə dəymiş maddi ziyan təqsirləndirilən şəxs tərəfindən tam ödənilib. Bu səbəbdən Mədəniyyət Nazirliyinin ona qarşı heç bir şikayət, tələb və iddiası olmayıb.
Məhkəmənin qərarı ilə Əziz Qarayusifli Cinayət Məcəlləsinin 308.1 və 313-cü maddələri ilə nəzərdə tutulmuş cinayət əməllərinin törədilməsində təqsirli bilinib. Təqsirləndirilən şəxs 2 il müddətinə dövlət və yerli özünü idarəetmə orqanlarında rəhbər və maddi məsul vəzifələr tutmaq hüququndan məhrum edilməklə, 4000 manat məbləğində cərimə cəzası təyin edilib. Təqsirləndirilən şəxs barəsində seçilmiş başqa yerə getməmək haqqında iltizam növündə qətimkan tədbiri hökm qanuni qüvvəyə minənədək dəyişdirilmədən saxlanılıb.
Qeyd edək ki, ötən ilin iyul ayında Mədəniyyət Nazirliyi tərəfindən Mərkəzi İncəsənət Məktəbində yoxlama aparılıb. Məlum olub ki, hər tədris ilinin əvvəlində məktəbin direktoru Əziz Yaşar oğlu Qarayusifli tərəfindən müəssisədə çalışan müəllim heyətinə dərs yükü pul qarşılığında verilib, yaxud həmin verilən dərs yükünün müəyyən bir hissəsinə aid olan maliyyə vəsaiti mənimsənilib.
Xatırladaq ki, sabiq mədəniyyət naziri Anar Kərimovun müvafiq əmri ilə Əməkdar artisti Əziz Yaşar oğlu Qarayusifli 2021-ci ilin fevral ayında Bakı Xoreoqrafiya Akademiyasının Tədris işləri üzrə prorektoru vəzifəsinə də təyin olunmuşdu. O, 1990-cı ildən Azərbaycan Dövlət Akademik Opera və Balet Teatrı orkestrın solisti, 2018-ci ildən isə Bakı Musiqi Akademiyasının dosentidir.
Əhməd
Ən son xəbərləri və yenilikləri almaq üçün ain.az saytını izləyin.
