"Red Bull" pilotu Maks Ferstappen etiraf edib ki, Azərbaycan Qran-prisindəki sıralama turu onun üçün ən çətinlərindən biri olub.
İdman.biz-in məlumatına görə, bu sözləri Ferstappen turdan sonra keçirilən mətbuat konfransında deyib.
"Bu, çoxlu qırmızı bayraqların olduğu çox uzun sıralanma sessiyası idi. Bir dövrəni yığmaq çətin idi; ya təkərlər hazır deyildi və ya sessiya kəsilirdi. Sonda yağış yağmağa başlayanda xüsusilə çətin idi", - "Red Bull" sürücüsü bildirib.
Çətinliklərə baxmayaraq, Ferstappen karyerasında ilk dəfə Bakıda seçmə mərhələni qazanıb. Bu, onun mövsümdə altıncı, karyerasında isə 46-cı pouludur. "Mən son dövrədə hər şeyimi verdim, hətta planlaşdırdığımızdan fərqli təkərlərdə belə. İlk məşqdə yaxşı idik və inkişaf etməyə davam etdik. Final hamı üçün xaotik keçdi, amma nəticədən razıyam", - o, deyib.
Onun komanda yoldaşı Yuki Tsunoda turu altıncı yerdə başa vurub, bu da onun "Red Bull" üçün ən yaxşı nəticəsidir.
Qarşıda əsas yarış var və Ferstappen buna ehtiyatlı nikbinliklə yanaşır: "Yaxşı start götürməli, tempimizi və təkərlərin aşınmasını idarə etməliyik. Məsələnin necə inkişaf edəcəyini görəcəyik".
İdman.biz
