BAKI, 21 sentyabr. TELEQRAF
Suriya Seçki Komissiyası Xalq Şurasına (birpalatalı parlament) seçkiləri oktyabrın 5-nə qədər təxirə salıb.
Teleqraf xəbər verir ki, bu barədə “Al Hadath” nəşri məlumat yayıb.
Sentyabrın 15-20-nə planlaşdırılan seçkilərin ölkədə gedən döyüşlərlə bağlı yaranan maddi-texniki problemlər səbəbindən təxirə salındığı bildirilir.
Səsvermədən sonra vətəndaşlar parlamentə 140 üzv seçəcək. 70 nəfər isə Suriya prezidenti Əhməd əl-Şaraa tərəfindən müvəqqəti müddətə təyin ediləcək. Müvəqqəti parlament 30 ay fəaliyyət göstərəcək və konstitusiya qəbul olunana və yeni seçkilər keçirilənədək qanunverici orqan kimi fəaliyyət göstərəcək.
Suriya Müvəqqəti Hökuməti 2024-cü il dekabrın 9-da Bəşər Əsəd rejiminin devrilməsindən sonra yaradılıb. 29 yanvar 2025-ci ildə ali qanunverici orqan olan Xalq Şurası rəsmən buraxılıb və Keçid Hökuməti Müvəqqəti Qanunvericilik Şurasına seçkilər elan edib.
