Amerika Birləşmiş Ştatlarında 1953-cü ildə göndərilən açıqca tam 72 il sonra sahibinə çatıb. Hadisə itmiş bir poçt göndərişinin izini tapan poçt işçiləri, jurnalistlər və könüllülərin səyləri nəticəsində həll olunan qeyri-adi bir sirrə çevrilib.
Açıqca 17 iyun 1953-cü il axşam saat 20:00-da Nyu-Yorkdakı Birləşmiş Millətlər Təşkilatının binasında möhürlənmişdi.
O dövrdə 16 yaşında olan Alan Bol Ottavadan Nyu-Yorka qatarla getmiş, oradan isə Puerto Rikoya təyyarə ilə yola çıxacaqdı. Yola çıxmazdan əvvəl ailəsinə xəbər vermək üçün BMT-nin yeni inşa olunmuş binasından bir açıqca göndərmiş və “Nyu-Yorka çatdım” mesajını yazmışdı. Lakin açıqca ailəsinə çatmayıb və onilliklər boyu tapılmayıb.
Açıqca keçən ay İllinoys ştatının Ottava şəhərindəki poçt şöbəsinə çatıb. Poçt işçiləri alıcının ünvanında artıq Bol ailəsinin yaşamadığını görərək araşdırma aparmağa başlayıblar.
Yerli jurnalistlər, soyadı araşdıran könüllülər və kitabxana arxivləri sayəsində kartı göndərənin bu gün 88 yaşında Sandpoint Aydahoda yaşayan Dr. Alan Bol olduğu müəyyən edilib.
Bol açıqcanın tapıldığını öyrənəndə əvvəlcə təəccüblə gülməyə başladığını bildirib. Keçən həftə Sandpointdəki bir poçt işçisi kartı ona “Üzr istəyirik, bir az gecikdik” deyərək təqdim edib.
Bol gənc yaşında etdiyi Puerto Riko səfərini hələ də həyatını dəyişən bir təcrübə olaraq xatırladığını bildirib.
72 illik gecikməyə baxmayaraq, o gün ailəsinə çatmalı olan mesaj nəhayət sahibinə geri dönmüş oldu.
