Bakı, 23 sentyabr, AZƏRTAC
SOCAR İtaliyanın aparıcı enerji şirkətlərindən biri olan “Italiana Petroli” (IP) şirkətinin 99,82 faiz səhmlərinin “API Holding”dən alınması barədə saziş imzalayıb.
SOCAR-dan AZƏRTAC-a bildirilib ki, əməliyyatın ənənəvi bağlanış şərtlərindən və müvafiq tənzimləyici təsdiqlərdən asılı olaraq, 2026-cı ilin birinci rübündə tamamlanması gözlənilir. Saziş SOCAR-ın 2024-cü ilin dördüncü rübündən iştirak etdiyi rəqabətli “M&A” prosesinin nəticəsidir.
“Italiana Petroli” İtaliyanın ən böyük inteqrə olunmuş “downstream" platformalarından biridir. Şirkət ölkə üzrə minlərlə yanacaqdoldurma məntəqəsinə, ildə təqribən 10 milyon ton emal gücünə malik iki neft emalı zavoduna, bitum, aviasiya yanacağı və sürtkü yağları kimi xüsusi məhsulların satışına və bütün ölkəni əhatə edən logistika sisteminə malikdir.
Şirkət təcrübəli yerli idarəçi komanda və təhlükəsizlik, uyğunluq və səmərəliliyə diqqəti ilə tanınan peşəkar işçi heyəti tərəfindən idarə olunur, müştərilər və fəaliyyət göstərdiyi icmalar arasında güclü reputasiyaya sahibdir. SOCAR IP-nin möhkəm bazar mövqeyini, nüfuzunu qorumaq və daha da gücləndirmək üçün şirkət komandası ilə əməkdaşlığı davam etdirməyi, həmçinin müştərilərə, tərəfdaşlara və maraqlı tərəflərə yüksəkkeyfiyyətli xidmətlərin fasiləsiz çatdırılmasını təmin etməyi planlaşdırır. SOCAR işçi qüvvəsini azaltmayacaq və şirkətin strategiyasına uyğun olaraq ətraf mühitə hörmət onun İtaliyadakı fəaliyyətində prioritet istiqamət olacaq.
Bu satınalma SOCAR-ın Avropa enerji bazarında mövcudluğunun genişləndirilməsi istiqamətində mühüm mərhələdir və Azərbaycanın İtaliya ilə ikitərəfli iqtisadi və enerji əlaqələrinin möhkəmləndirilməsinə, eyni zamanda, Avropa regionunun enerji təhlükəsizliyi və dayanıqlı inkişafına töhfə vermək öhdəliyini əks etdirir.
“API Holding” detallı seçim prosesindən sonra SOCAR-ın institusional profili və biznes sahəsindəki zəngin təcrübəsi nəticəsində IP-dəki bütün payını satmaq qərarını verib. “API Holding” hesab edir ki, etibarlı nüfuza malik beynəlxalq sənaye qrupuna satış IP-yə illər ərzində mövcud idarəetməni səciyyələndirən mükəmməllik axtarışını davam etdirməyə imkan verəcək, korporativ istedadların dəyərləndirilməsi, qrupun qlobal miqyasda mövqeyinin möhkəmləndirilməsi və Aralıq dənizində strateji mərkəz kimi missiyasının təsdiqlənməsi ilə müşayiət olunacaq.
“Italiana Petroli”nin alınması beynəlxalq diversifikasiya strategiyamızın həyata keçirilməsində mühüm addımdır. Bu, rəqabətədavamlı, innovativ və sosial məsuliyyətli biznesin inkişafına uzunmüddətli sadiqliyimizi göstərir, Avropanın enerji təhlükəsizliyinə töhfə verir və Azərbaycanla İtaliya arasında tərəfdaşlığı daha da gücləndirir”,- deyə SOCAR-ın prezidenti Rövşən Nəcəf bildirib.
“IP yanacaq sektorunda ölkə səviyyəsində istinad nöqtəsi olub və qalmaqda davam edir, həmçinin İtaliyada mobillik və enerji təhlükəsizliyi əsas faktordur.
90 ildən artıq müddətdə İtaliyanın önəmli şirkətlərindən birinə çevrilmiş bu quruma rəhbərlik etdikdən sonra biz gələcək sahiblərə bilik, qeyri-adi peşəkarlar, zəngin təcrübə və innovasiya etməkdə müstəsna bacarıqdan ibarət möhkəm bir miras buraxmaqdan qürur duyuruq.
İdarə heyətinə və bütün əməkdaşlara səmimi təşəkkürümüzü ifadə edirik. Onların səmərəli fədakarlığı sayəsində əla nəticələrimiz reallığa çevrildi və bu şirkət bazarda əsas oyunçulardan birinə çevrilərək yüksəksəviyyəli beynəlxalq qurumlardan investisiyalar cəlb etmək gücünə malik oldu”,- deyə Uqo Braketti Peretti qeyd edib.
SOCAR haqqında :
SOCAR — Azərbaycanda yerləşən qlobal enerji şirkətidir. Şirkət enerji resurslarının hasilatı, emalı və paylanması üzrə ixtisaslaşır. Cənubi Qafqaz regionunun ən böyük inteqrə olunmuş enerji müəssisəsi olan SOCAR beynəlxalq bazarlarda da əhəmiyyətli mövqeyə malikdir.
“Italiana Petroli” haqqında:
“Italiana Petroli” 1933-cü ildən mobillik və “downstream” (paylama və satış) sahəsində fəaliyyət göstərir. 1600 işçisi, 4500 IP markalı yanacaqdoldurma məntəqəsi şəbəkəsi, iki neftayırma zavodunda təxminən 10 milyon ton emal gücü və bütün ölkə üzrə yayılmış logistika sistemi ilə şirkət bazarda ilk özəl oyunçudur.
