ain.az bildirir, Milli.az portalına istinadən.
Tayvanlı alimlərin apardığı araşdırmaya görə benzoad natriya adlı qida konservantı Alzheimer xəstəliyinə qarşı təsirli ola bilər.
Milli.Az xəbər verir ki, nəticələr "Translational Psychiatry" jurnalında dərc olunub.
Mütəxəssislərin sözlərinə görə, benzoad natriya həmçinin darçının metaboliti hesab olunur və orqanizmdə Alzheimerlə əlaqəli zülalların səviyyəsini azalda bilir. Xüsusilə də qanda amiloid-beta 1-42 göstəricisi yüksək olan pasiyentlərdə zehni fəaliyyətin nəzərəçarpacaq dərəcədə yaxşılaşdığı müşahidə olunub.
Xatırladaq ki, Alzheimer xəstəliyi yaddaş itkisi və idrak qabiliyyətlərinin zəifləməsi ilə müşayiət olunan proqressiv neyrodegenerativ pozğunluqdur. Bu xəstəliyin əsas səbəblərindən biri beyin hüceyrələrinə zərər verən amiloid peptidlərinin toplanması hesab olunur. Mövcud müalicə üsulları bu zülalları bədəndən xaric edə bilir, lakin bahalıdır, venadaxili tətbiq olunur və beyin ödemi, qanaxma kimi ciddi fəsadlara səbəb ola bilər.
Araşdırmada 50-100 yaş aralığında olan 149 Alzheimer xəstəsi iştirak edib. Onlara 24 həftə ərzində müxtəlif dozada benzoad natriya və ya plasebo verilib. Həm idrak qabiliyyətləri, həm də qandakı amiloid səviyyələri mütəmadi olaraq izlənilib.
Məlum olub ki, Benzoad natriya həm təhlükəsiz, həm də istifadəsi rahat olan müalicə variantı kimi diqqət çəkir. O, amiloid zülallarını azaldaraq idrak qabiliyyətlərinin qorunmasına kömək edə bilər.
Ən yaxşı nəticələr gündə 750 və ya 1000 mq preparat qəbul edən pasiyentlərdə qeydə alınıb. Onlarda amiloid-beta 1-40 və ümumi amiloid zülallarının səviyyəsi azalıb. Amiloid-beta 1-42 göstəricisi yüksək olan şəxslərdə isə idrak funksiyalarında daha güclü irəliləyiş müşahidə olunub.
Qeyd edək ki, benzoad natriya daha çox qazlı içkilərdə, meyvə şirələrində və nektarlarda, ketçup, mayonez və soya kimi müxtəlif souslarda, həmçinin mürəbbə, cem, kompot və konservləşdirilmiş tərəvəzlərdə istifadə olunur. Bununla yanaşı, jelə tipli şirniyyatlarda, hazır desertlərdə, enerji içkilərində və turş dadlı məhsullarda da rast gəlinir.
Lakin, yüksək temperatur və C vitamini ilə qarşılıqlı təsirdə benzoad natriya zərərli hesab edilən benzol maddəsinə çevrilə bilər. Buna görə də bir çox ölkələrdə onun istifadəsinə sərt normativ məhdudiyyətlər qoyulub.
İsmayıl
Milli.Az
Ən son yeniliklər və məlumatlar üçün ain.az saytını izləyin, biz hadisənin gedişatını izləyirik və ən aktual məlumatları təqdim edirik.
