ain.az, Azpolitika.az portalına istinadən məlumatı açıqlayır.
Rusiya Maliyyə Nazirliyi 2026–2028-ci illər üçün federal büdcə layihəsini açıqlayıb.
“AzPolitika” Rusiya mətbuatına istinadla xəbər verir ki, layihəyə əsasən, əlavə dəyər vergisinin (ƏDV) standart dərəcəsi 2026-cı il yanvarın 1-dən 20%-dən 22%-ə yüksəldiləcək. Hesablamalara görə, bu addım büdcəyə hər il bir trilyon rubl əlavə vəsait gətirəcək. Əlavə gəlirin əsas hissəsi müdafiə və təhlükəsizlik sahələrinə yönəldiləcək.
Layihədə bildirilir ki, sosial əhəmiyyətli məhsullar – qida, dərman preparatları, tibbi məhsullar və uşaqlar üçün mallar üzrə ƏDV-nin güzəştli 10%-lik dərəcəsi saxlanacaq.
Bundan əlavə, Maliyyə Nazirliyi büdcənin gəlir bazasını artırmaq məqsədilə bir sıra digər tədbirlər də təklif edir:
* Pandemiya dövründə tətbiq olunan sığorta haqlarına müvəqqəti güzəştlərin ləğvi;
* ƏDV-nin sadələşdirilmiş ödəmə sxeminə daxil olma gəlir həddinin 60 milyon rubldan 10 milyon rubla endirilməsi;
* Bukmeker şirkətlərinin vergiyə cəlb edilməsi;
* Ən iri dövlət şirkətlərinin özəlləşdirilməsi.
Məlumat üçün qeyd edək ki, 2025-ci ildə ƏDV-nin büdcəyə təxminən 16 trilyon rubl gəlir gətirəcəyi gözlənilir. 2026-cı ildə isə dərəcə artırılmadan bu rəqəmin 17 trilyon rubla çatacağı planlaşdırılır. Tarixi müqayisəyə əsasən, 2019-cu ildə ƏDV-nin 18%-dən 20%-ə qaldırılması büdcəyə 500 milyard rubl əlavə gəlir təmin etmişdi.
Ekspertlər bildirirlər ki, ƏDV-nin artırılması qısamüddətli dövrdə inflyasiyanı təxminən 1 faiz bəndi yüksəldə və istehlakçı tələbinə mənfi təsir göstərə bilər. Lakin uzunmüddətli perspektivdə bu tədbir büdcə kəsirini azaltmağa və maliyyə sistemini sabitləşdirməyə imkan verəcək.
Rasim Əliyev
“AzPolitika.info”
Daha ətraflı məlumat və yeniliklər üçün ain.az saytını izləyin.
