İran Rusiyadan MiQ-29 qırıcı təyyarələrinin yeni partiyasını qəbul edib.
“Poliqon” “İnter Bellum News”a istinadən xəbər verir ki, bunu İran parlamentinin deputatı və Milli Təhlükəsizlik Komitəsinin üzvü Abolfazl Zohrevand açıqlayıb.
Onun sözlərinə görə, bu qırıcıların tədarükü İranın daha təkmil sistemlərin çatdırılmasını gözlədiyi bir vaxtda, ölkənin hava hücumundan müdafiə imkanlarını gücləndirmək üçün qısamüddətli tədbir kimi nəzərdə tutulub.
Deputat Tehranın hələ də Rusiyadan Su-35 qırıcılarını almaq prosesində olduğunu, lakin bu tədarüklərin dəfələrlə gecikdirildiyini bildirib.
A.Zohrevand qeyd edib ki, İran Rusiyanın S-400 kimi müasir HHM sistemlərini də əldə etməyə çalışır və həmçinin ölkənin laylı hava hücumundan müdafiə qabiliyyətini gücləndirmək üçün uzunmüddətli strategiyanın bir hissəsi olaraq Çinin HQ-9 sistemini də nəzərdən keçirir.
