Ajans.az BBC-ə istinadən xəbər verir ki,ilk dəfə siyasətə qoşulmazdan əvvəl pastor kimi fəaliyyət göstərmiş Çakwera yekun nəticələr elan olunmazdan əvvəl məğlubiyyətini etiraf edib və Mutharika ilə telefon əlaqəsi saxlayaraq onu “tarixi qələbəsi” münasibətilə təbrik edib. Hüquq professoru olan Mutharika daha əvvəl 2014–2020-ci illərdə Malaviyə rəhbərlik etmiş, lakin 2020-ci ildə keçirilmiş təkrar seçkilərdə Çakveraya uduzmuşdu. O, indi ciddi yanacaq və xarici valyuta çatışmazlığı ilə üzləşən, inflyasiyanın təxminən 30% olduğu bir ölkədə iqtisadiyyatı idarə etməyi öz üzərinə götürür. Paytaxt Lilonqvedə bir supermarketdə dondurulmuş toyuğun qiyməti 20 dollara (təxminən 15 funt sterlinq) qədər qalxıb – bu isə əhalinin böyük hissəsinin gündə 2 dollar və ya daha az qazandığı bir ölkə üçün yüksək rəqəmdir. Seçki Komissiyası səkkiz günlük gecikməni bütün səsvermə materiallarının diqqətlə yoxlanması və daxil olan şikayətlərin araşdırılması ilə izah edib. Qeyd edək ki, Mutharika daha əvvəl 2019-cu ildə də seçkilərdə qalib gəlmişdi. Lakin həmin seçkilər zamanı “nəticələrin dəyişdirilməsi üçün korrektə mayesindən istifadə olunması” kimi geniş yayılmış pozuntular aşkarlandığından, ölkənin Ali Məhkəməsi nəticələri ləğv etmişdi. Növbəti il keçirilən təkrar seçkilərdə Çakwera inamlı qələbə qazanmışdı. Bu, Mutharika və Çakveranın dördüncü siyasi qarşıdurması idi. Peter Mutharika-nın mərhum qardaşı Bingu wa Mutharika da vaxtilə Malaviyə rəhbərlik edib və 2012-ci ildə vəzifədə olarkən vəfat etmişdi. Çakveranın güzəşt çıxışı zamanı o, bəzi “qanunsuzluqlar” və “anomaliyalar”la bağlı narahatlıqlarını ifadə etsə də, malavililərin “hökumət dəyişikliyi üçün kollektiv iradəsinə” hörmət etdiyini bildirib: “Bu anomaliyalar seçkinin nəticələrinin professor Mutharika-nı qalib kimi təqdim etməsini qeyri-inandırıcı etsə də, xalqın iradəsini qəbul edirəm”, – deyə o bildirib. Onun bu bəyanatı Mutharika tərəfdarları arasında sevinclə qarşılanıb. Lilonqve küçələrində yüzlərlə insan mahnılar oxuyub, rəqs edib. Yerli Çiçeva dilində "ata" mənasını verən “adadi” şüarları səsləndirilib. Avtomobillər siqnal verib, musiqi səsləndirib, bəziləri isə Çakveranın portretlərini cıraraq onun gedişini qeyd ediblər. "Achoke!" – yəni “o getməlidir” şüarı da tez-tez eşidilib. Bayram tədbirləri Çakveranın son mitinq keçirdiyi Civo stadionunda da davam edib və gecə saatlarınadək sürüb. Analitiklər bildirirlər ki, bu nəticə Mutharika-nın şəxsi qələbəsindən daha çox, hazırkı prezident Çakveraya qarşı ictimai narazılığın göstəricisidir. Onun dövründə Malavi korrupsiya, iqtisadi durğunluq, yüksək həyat xərcləri, tez-tez baş verən elektrik kəsintiləri və xarici valyuta qıtlığı kimi ciddi problemlərlə üzləşib. Çakveranın tərəfdarları isə yaranmış böhranı onun nəzarətindən kənar səbəblərlə – quraqlıq, təbii fəlakətlər, COVID-19 pandemiyası və Ukrayna müharibəsi ilə əlaqələndirirlər. Buna baxmayaraq, Mutharika-nın seçki kampaniyasındakı əsas şüarı olan “sübut olunmuş liderliyə qayıdış” ölkədə rezonans doğurub. İndi isə keçmiş prezident ilk müddətində olduğu kimi, yüksək inflyasiyanı və iqtisadi çətinlikləri aradan qaldırmaq qabiliyyətini yenidən sübut etməlidir.
