Klassik Azərbaycan detektiv filmi “O qızı tapın” bu il 55 illiyini qeyd edir. Sovet milisinin 50 illiyinə həsr olunmuş ekran əsərinin ssenarisini rejissor Həsən Seyidbəyli yazıb.
Filmin premyerası 1971-ci il iyulun 5-də Moskvada baş tutub. Bununla belə, ilk nümayiş nazir başda olmaqla Daxili İşlər Nazirliyinin əməkdaşları üçün təşkil olunub və onlar bu ekran əsərinə baxdıqdan sonra filmin yaradıcı kollektivini təbrik edib, peşəkarlıq nöqteyi-nəzərindən onu yüksək qiymətləndiriblər.
Görkəmli Azərbaycan rejissoru və yazıçısı Həsən Seyidbəylinin detektiv janrına keçməsi təsadüfi deyildi. Əvvəlcə onun sənədli esseləri Moskvanın “Sovetskaya militsiya” jurnalında dərc olunub. Sonralar oxucular bu hekayələrilə də tanış olublar. Tezliklə yazıçı-rejissorun qələmə aldığı “Şimaldan Şimala” romanı da çap olunub, məhz bu əsər sonradan filmin ssenarisinə çevrilib.
Filmin quruluşçu operatoru Arif Nərimanbəyov, quruluşçu rəssamı Məmmədağa Hüseynov, geyimlərin tərtibatçısı isə tanınmış mədəniyyət xadimi Bədurə Əfqanlı olub. Filmin musiqisini Azərbaycan SSR Xalq artisti Tofiq Quliyev bəstələyib. Musiqiləri ifa edən Azərbaycan Dövlət Simfonik Orkestrinə isə SSRİ Xalq artisti Niyazi dirijorluq edib. Mahnıları məşhur estrada müğənniləri Flora Kərimova və Oktay Ağayev ifa ediblər. Filmə 17,5 milyon tamaşaçı baxıb.
Həsən Seyidbəylinin “O qızı tapın” filmi 55 il ərzində bir çox aktyor üçün kinoda uğurlu start olub, sovet dövründə keyfiyyətli detektiv film nümunəsi olmaq hüququnu qazanıb.
XQ
