1 iyul 2024-cü ildən etibarən Oxu.az mobil tətbiqinin köhnə versiyasına dəstək dayandırılacaq - yenilənmiş versiyanı endirmək üçün Google Play və ya AppStore-a keçməyiniz xahiş olunur.
34 yaşlı keçmiş hərbçi İsgəndər Tahir oğlu Məmmədov itkin düşüb.
Bu barədə Oxu.Az-a onun tanışı Səbuhi Əsədov məlumat verib.
Səbuhi Əsədov bildirib ki, İsgəndər Məmmədov keçmiş hərbçi olub, şizofreniyadan əziyyət çəkirmiş:
"Çox mərifətli, qanacaq sahibi insan olub. Mənim işçim idi. Bakıda işləyirdi. Psixoloji müalicə alırdı. Dərmanlar qəbul edirdi. Son iki-üç ayda dərmanların ağır təsirlərinə görə qəbulu dayandırıb. Sonra mənə dedi ki, bir az istirahət etmək istəyir. Quba rayonuna getdi.
TV-də onun barəsində danışılıb və şizofreniyadan əziyyət çəkdiyini də o zaman öyrəndim. Hazırda biz çox narahatıq ki, birdən özünə nəsə edər, başına pis hadisə gələr. Habelə psixoloji problemləri olduğuna görə hər hansı hadisəni törədə biləcəyindən narahatlıq duyuruq.
Quba rayonunda polis əməkdaşlarına müraciət edilib".
O qeyd edib ki, İsgəndər Məmmədov avqustun 11-də evdən çıxıb, bir daha geri qayıtmayıb:
"Avqustun 11-də Qubada psixoloji mərkəzin işçiləri onu müəssisəyə aparmaq üçün evə gəldikdə İsgəndər qorxub, evdən qaçıb. Üzərində nə telefon, nə də pul götürüb. Evdən çıxan gündən bəri ondan heç bir xəbər yoxdur, izi-tozu itib. Evin tək övladıdır. Anasının gözü yollarda qalıb. Onu görən, tanıyan, bilən şəxslərdən məlumat vermələri xahiş olunur".
Daxili İşlər Nazirliyindən (DİN) Oxu.Az-ın sorğusuna cavab olaraq bildirilib ki, hazırda İsgəndər Məmmədovun tapılması üçün axtarış elan olunub:
"Onun tapılması istiqamətində polis əməkdaşları tərəfindən zəruri tədbirlər görülür".
Aygün Mirakif
