ABŞ-nin "Meta" şirkəti yaxın vaxtlarda Böyük Britaniya istifadəçilərinə "Facebook" və "Instagram" sosial şəbəkələrində reklamların göstərilməsini pullu abunə qarşılığında söndürmək imkanı verəcək.
Far.Az-in məlumatına görə, bu barədə şirkətin açıqlamasında bildirilir.
Yeni imkanın qiyməti mobil cihazlarda (iOS və Android) ayda 3,99 funt sterlinq (təxminən 4.10 AZN ), veb-versiyada isə 2,99 funt sterlinq (təxminən 4 AZN) olacaq.
Qeyd edək ki, istifadəçilər lentlərində, hekayələrdə və videolarda reklam görməyəcəklər. Bu isə sosial şəbəkədən istifadənin daha rahat və təmiz vizual mühitdə keçməsinə imkan verəcək. Reklamlarla qarşılaşmayan istifadəçilər daha az vaxt itirəcək, kontentə fasiləsiz baxa biləcəklər.
"Meta" əsas gəlirini reklam üzərindən qazanır və istifadəçilərin maraqlarına uyğun reklam göstərmək üçün onların məlumatlarını emal edir. Reklamsız abunə isə bu prosesi minimuma endirərək şəxsi məlumatların istifadəsini azaldacaq. Davamlı reklam axını bəzən istifadəçilərdə narahatlıq və diqqət dağınıqlığı yaradır. Reklamsız versiya isə sosial şəbəkədə daha balanslı və sakit təcrübə təklif edə bilər.
Reklamlar olmadan istifadəçi yalnız dostlarının paylaşımlarını, izlədiyi səhifələrin xəbərlərini və maraqlandığı mövzuları görəcək. Bu da sosial şəbəkənin əsas funksiyasına – insanları əlaqələndirmək və informasiya mübadiləsinə xidmət edəcək.
