İsrailin baş naziri: Plan hələ tamamlanmayıb; İsrail Tramp komandasının işi ilə birbaşa əməkdaşlıq edir və hədəf girovların azadlığı, HƏMAS-ın hakimiyyətinin aradan qaldırılmasıdır...
Poliqon xəbər verir ki, Təl-Əviv hələ Donald Trampın təqdim etdiyi 21 maddəlik sülh planını rəsmi şəkildə qəbul etməyib, lakin plan üzərində fəal iş aparılır. İsrailin baş naziri Benyamin Netanyahunun sözlərinə görə, hökumət hazırda prezident Trampın komandasına birbaşa dəstək verərək sənədin son variantı üzərində əməkdaşlıq edir.
Netanyahu jurnalistlərə planın tam şəkildə yekunlaşmadığını diqqətə çatdırıb və ciddi danışıqların davam etdiyini vurğulayıb.
"Biz bunun üzərində işləyirik. Plan hələ tamamlanmayıb, amma biz məhz indi prezident Trampın komandası ilə əməkdaşlıq edirik. Ümid edirəm ki, onu həyata keçirə biləcəyik, çünki məqsədimiz girovlarımızı azad etmək, HƏMAS-ın hakimiyyətinə son qoymaq, onları silahsızlandırmaq, Qazanı demilitarizasiya etmək və Qaza və İsrail əhalisi, eləcə də bütün region üçün yeni bir gələcək yaratmaqdır", deyə baş nazir vurğulayıb.
Netanyahunun bəyanatı həm də onu göstərir ki, israilli rəsmilər və Vaşinqton arasındakı məsləhətləşmələr hələ də gərginlik və diplomatik razılaşma mərhələsindədir. Baş nazirin sözlərindən aydın olur ki, planın icrası üçün ilkin siyasi və təhlükəsizlik mexanizmlərinin hələ razılaşdırılması tələb olunur, xüsusən girovların buraxılması, silahsızlaşdırma və Qaza daxilindəki demilitarizasiya tədbirləri ilə bağlı konkret addımlar və s.
Ekspertlərə görə, belə bir planın reallaşması yalnız regional və beynəlxalq şərtlərin uyğun gəlməsi, həmçinin HƏMAS və digər yerli aktorlarla bağlı konkret təminatlar əsasında mümkün ola bilər; Netanyahunun bəyanatı isə İsrail tərəfinin hələ tam öhdəlik götürmədiyini, lakin Vaşinqtonla aktiv dialoqu davam etdirdiyini göstərir.
Poliqon.info
