ABŞ prezidenti bildirib ki, 21 maddəlik sülh planını İsrailin baş naziri Benyamin Netanyahu ilə bazar ertəsi keçiriləcək görüşdə müzakirə edəcək...
Poliqon xəbər verir ki, ABŞ prezidenti Donald Tramp Qəzza ilə bağlı sülh sazişini sona çatdırmaq niyyətində olduğunu açıqlayıb. Reuters Agentliyinin məlumatına görə, Tramp bu barədə sabah İsrailin baş naziri Benyamin Netanyahu ilə keçirəcəyi görüş ərəfəsində danışıb.
Tramp bildirib ki, tərəflər arasında aparılan intensiv danışıqlar nəticəsində razılaşma sənədinin əsas hissələri artıq formalaşdırılıb. Onun sözlərinə görə, məqsəd Qəzzada mövcud münaqişəni dayandırmaq, girovların azad olunmasına nail olmaq və regionda uzunmüddətli sabitlik üçün yeni təhlükəsizlik və idarəçilik mexanizmi qurmaqdır.
ABŞ administrasiyası son həftələrdə həm İsrail, həm də regiondakı digər aktorlarla birbaşa təmasları artırıb. Ekspertlərin fikrincə, Trampın bu bəyanatı Vaşinqtonun Yaxın Şərqdə diplomatik fəallığını yüksəltmək cəhdi kimi qiymətləndirilir. Onlar hesab edirlər ki, əgər razılaşma yekunlaşdırılsa, bu, yalnız Qəzza üçün deyil, bütün bölgə üçün mühüm siyasi dönüş nöqtəsi ola bilər.
Netanyahu isə daha əvvəl açıqlamasında ABŞ-la əməkdaşlığın davam etdiyini təsdiqləyərək, məqsədin HƏMAS-ın hərbi imkanlarını aradan qaldırmaq, Qəzzanı demilitarizasiya etmək və bölgədə yeni gələcək qurmaq olduğunu vurğulamışdı.
Müşahidəçilər hesab edirlər ki, bazar ertəsi keçiriləcək görüşdə tərəflər sənədin yekun mətnini razılaşdırmağa çalışacaq və bu, Yaxın Şərqdə sülh prosesinin taleyi baxımından həlledici ola bilər.
Poliqon.info
