Tədqiqatçılar minlərlə kraterdə qiymətli metalları aşkar etmə ehtimalını irəli sürürlər…
Poliqon xəbər verir ki, Ayda minlərlə kraterin dərinliklərində qiymətli metallara rast gəlinə bilər. Planetary and Space Science jurnalında dərc olunan yeni araşdırmaya görə, Yerə yaxın asteroidlər Ay səthinə düşərkən yalnız qismən buxarlanır, qalan hissəsi isə müəyyən şərtlərdə qorunub saxlanılır. Bu isə o deməkdir ki, Ayda platin, palladium və rodium kimi platina qrupuna aid qiymətli metallar gizlənmiş ola bilər.
Alimlərin hesablamalarına görə, təxminən 6500 kraterdə platina qrupuna aid metalların izləri mövcuddur. Onlardan 38-i isə 19 kilometrdən böyük diametrə malik olmaqla, mərkəzi zirvəyə sahib kraterlərdir. Bu cür kraterlərdə qiymətli filizlərin daha çox cəmləşməsi ehtimalı yüksəkdir.
Bununla yanaşı, təxminən 3400 kraterdə suyun izləri, hidratlaşdırılmış minerallar şəklində buz saxlandığı güman edilir. Bu isə Ayda insanın uzunmüddətli tədqiqat aparması üçün həyati əhəmiyyət daşıyan resurs hesab olunur.
Müstəqil astronom Cəyant Çennamangalamanın rəhbərlik etdiyi tədqiqat qrupunun fikrincə, Ayda toplanan asteroid filizlərini çıxarmaq, kosmosda sərbəst hərəkət edən asteroidləri hasil etməkdən daha səmərəli və gəlirli ola bilər. Çünki Ayın səthində olan asteroid qalıqlarının aşkarlanması və çıxarılması texniki cəhətdən daha əlçatan görünür.
Alimlər bildirirlər ki, asteroidlərin Ayla toqquşması zamanı onların bir hissəsi buxarlansa da, xüsusən iri kraterlərdə qalıqlar mərkəzə yığılaraq dəyərli mineral qatları yaradır. Bu isə Ayın statistik baxımdan Yerə yaxın asteroidlərdən daha zəngin resurs mənbəyi olduğunu göstərir.
Mütəxəssislər hesab edirlər ki, ilk növbədə hansı kraterlərdə bu ehtiyatların toplandığını dəqiq müəyyənləşdirmək lazımdır. Bunun üçün bahalı eniş aparatları əvəzinə Ay orbitindən uzaqdan zondlama üsulunun daha səmərəli olacağı düşünülür.
Beləliklə, Ay gələcəkdə insanlığın kosmosda resurs hasilatı üzrə ilk böyük sınaq meydanı ola bilər.
Poliqon.info
