NATO sərhədlərində Rusiya pilotsuz təyyarələrinə görə, Türkiyə Alyansın şərq cinahını gücləndirir.
İnterpress.az xəbər verir ki, bu barədə “Türkiyə Gazetesi” məlumat yayıb.
Rusiya pilotsuz təyyarələri getdikcə Avropa səmalarında peyda olur. Bu yaxınlarda onlar Polşa, Rumıniya, Danimarka və Norveçdə, Rusiya qırıcıları isə Estoniya ilə sərhəddə müşahidə edilib. NATO müdafiəsini gücləndirir və Türkiyə əsas rol oynayır.
Qəzetin məlumatına görə, Ankara NATO-nun şərq cinahını dəstəkləyərək Alyansı hava hücumundan müdafiə sistemləri və modernləşdirilmiş F-16-larla təmin edir.
Oktyabrda Brüsseldə baş katib Ruttenin sədrliyi ilə NATO-ya üzv ölkələrin müdafiə nazirlərinin iclası keçiriləcək.
Əsas mövzu Rusiyanın fəallığı fonunda Baltik regionunda təhlükəsizlik olacaq. Türkiyənin müdafiə naziri Gülər iştirakını təsdiqləyib.
Ankara həmçinin Alyansın şərqdə döyüş təyyarələri, freqatlar və əks-dron texnologiyaları yerləşdirəcəyi yeni Şərq Nəzarəti təşəbbüsünü dəstəkləyir.
Bundan əlavə, NATO real vaxt rejimində pilotsuz təyyarələri izləyə və məhv etməyə qadir olan yeni sensorlar və silahların tətbiqini sürətləndirir.
Bu sistemlər artıq bir sıra ölkələrdə sınaqdan keçirilməyə başlayıb və Türkiyə onların yerləşdirilməsində fəal iştirak edir.
Xuraman Etibarlı
İnterpress.az
