BMT-nin Ümumdünya Ərzaq Proqramının icraçı direktorunun müavini Karl Skau Kanadanın CBC telekanalına bildirib ki, Qəzza zolağına ərzaq tədarükü kəskin şəkildə artırılmasa, Qəzza zolağının bütün əhalisi bir neçə həftə ərzində aclıqdan ölə bilər.
“BMT əvvəllər təsdiq etdiyi kimi, Qəzza zolağının əhalisinin yalnız bir hissəsi aclıqdan əziyyət çəkirdi, lakin bu vəziyyət bir neçə həftə davam edərsə, anklavın bütün əhalisi aclıqdan öləcək” dedi.
Skaunun sözlərinə görə, hazırda Qəzza zolağına yeməklə dolu təxminən 100 yük maşını daxil olur. “Bu, okeanda bir damladır, çünki söhbət 2,2 milyon insandan gedir. Biz bu aclığın aradan qaldırılması üçün yardım çatdırılmasının həcmini əhəmiyyətli dərəcədə artırmalıyıq, çünki atəşkəs dövründə fevral-mart aylarında, biz gündə orta hesabla 600-700 yük maşını [ərzaqla] gətirirdik”, – BMT nümayəndəsi əlavə edib.
Sentyabrın ortalarında BMT-nin Ərzaq və Kənd Təsərrüfatı Təşkilatı bildirdi ki, əsasən Qəzza zolağı və Sudanda, ardınca Cənubi Sudan, Yəmən, Haiti və Malidə təxminən 1,4 milyon insan qida təhlükəsizliyinin fəlakətli səviyyələri ilə üzləşib. Təşkilatın yenilənmiş “Ərzaq Böhranları üzrə Qlobal Hesabatı” Qəzza zolağında aclıq vəziyyətini təsdiqləyib.
