Prezident Donald Tramp bildirib ki, diplomatik fəaliyyətinə görə Nobel Sülh Mükafatını qazanmasa, bu, ABŞ üçün “böyük təhqir” olacaq.
Reyting.az xarici mediaya istinadla bildirir ki, Amerika prezidenti bu barədə Virciniya ştatının Quantiko şəhərində bir qrup yüksək rütbəli hərbi məmur qarşısında çıxışı zamanı söz açıb.
“Mən yeddi münaqişənin sona çatmasına kömək etmişəm və Qəzza planı işləsə, bu, səkkiz olacaq. Səkkiz ayda səkkiz - heç kim bunu etməyib”, - Tramp vurğulayıb.
O, həmçinin Nobel Komitəsinin işinə şübhə ilə yanaşdığını da bildirib: “Sən Nobel mükafatı alacaqsan? Qətiyyən yox. Heç nə etməmiş hansısa oğlana verəcəklər. Bəlkə də Donald Tramp haqqında kitab yazan yazıçıya”.
Tramp artıq Pakistan, Kamboca, İsrail və Amerika respublikaçılarından Nobel Sülh Mükafatına namizədlər alıb. Ağ ev də öz bəyanatlarında israr edib ki, mükafat prezident üçün “çoxdan gecikib”.
Eyni zamanda Tramp etiraf edir ki, həm Qəzzadakı, həm də Ukraynadakı müharibə onun üçün diplomatik çağırış olaraq qalır.
E. KAMAL
