Şatdaun ABŞ-ın zəifliyini göstərsə də, Trampın siyasi çəkisini artırır - ÖZƏL

Bu fikirləri politoloq Tural İsmayılov Olaylar.az-a açıqlamasında söyləyib: 
" Daxili siyasi sistemdəki qeyri-müəyyənlik beynəlxalq tərəfdaşlarda narahatlıq yaratsa da, Trampın populist ritorikası və sərt mövqeyi ABŞ-ın zəifləməsi təsəvvürünü yumşaldır. Tramp çox vaxt bu kimi böhranları "sistemin dəyişməli olduğunu" sübut edən arqument kimi göstərir. Bu isə onun siyasi kapitalını artırır. İqtisadi baxımdan şatdaun qısamüddətli mənfi təsirlər yaratsa da, ABŞ iqtisadiyyatının hələ də dünyada ən böyük və dayanıqlı sistemlərdən biri olduğu reallığı dəyişmir. Dolların qlobal valyuta statusu, ABŞ bazarının dərinliyi və innovasiya potensialı uzunmüddətli riskləri azaldır. Əksinə, investorların bir çoxu bu prosesdə Trampın "güclü liderlik" tezisini daha inandırıcı qəbul edə bilər. Qlobal bazarlara təsir baxımından müəyyən dalğalanmalar qaçılmaz olsa da, ABŞ iqtisadiyyatının həcmi və təsir gücü sistemin çökməsinə imkan vermir. Bu, beynəlxalq investorları da müəyyən mənada sakitləşdirir. Ümumilikdə isə şatdaun ABŞ hakimiyyətinin siyasi mexanizmlərindəki ziddiyyətləri üzə çıxarır, amma Trampın güclü fiqur kimi mövcudluğu bu böhranın yaratdığı siyasi boşluğu dolduran əsas faktora çevrilir.
Yəni, şatdaun ABŞ sisteminin zəifliyini göstərsə də, Trampın siyasi çəkisi fonunda ölkənin tamamilə zəif görünməsinin qarşısını alır".

• Donald Tramp
• Güclü Lider
• Şatdaun
• Siyasi Mövqey