Hələ 1970-ci illərin əvvəllərində İsveç orta ömür uzunluğuna görə dünyada birinci yer tutub.
Publika.az xəbər verir ki, ölkə hazırda İtaliya, İspaniya və Yaponiyadan geridə qalaraq, onuncu yerə düşüb.
Karolina İnstitutunun dosenti Karin Modiqin sözlərinə görə, İsveç körpə ölüm hallarının azalmasına erkən nail olub və uzun müddət öz üstünlüyünü qoruyub saxlayıb. Bu gün uşaqlar arasında ölüm halı dünyada ən aşağı göstəricilərdən biri olaraq qalır (0,2 faiz), buna görə də geriləmənin səbəbi böyüklərdən ibarət olan yaş qruplarındadır.
İsveçdə 85 yaşdan yuxarı insanların ölüm riskinin bir çox digər ölkələrlə müqayisədə daha yüksək olması xüsusilə nəzərə çarpır. İlkin araşdırmalar göstərir ki, ən həssas yaşlılar - daha çox qayğıya ehtiyacı olanlar - Yaponiya və Cənubi Avropada daha çox yaşayırlar.
“Biz bilirik ki, Yaponiya və İsveçdə yaşlılara qayğı və həyatı təmin edən tədbirlərə münasibətdə mədəni fərqlər var. Məsələn, İsveçdə bir yaşlı insan artıq yemək yemirsə, biz, bir qayda olaraq, ona zond qoymuruq, biz onun seçiminə hörmətlə yanaşırıq”, - deyə K.Modiq izah edir.
