Teleqraf xəbər verir ki, bunu gürcüstanlı müxalif siyasətçi Paata Burçuladze deyib.
"Bu gün döyüş günüdür, Gürcüstan azadlığını geri alır. Hamınız küçəyə çıxın, bayraqları unutmayın. Bu gün Gürcüstan vətəndaşlarının qoruyacağı bir bayrağımız var. Hər şey yaxşıdır, çoxlu insanlar çıxacaq. Hamımız ölkəmizi müdafiə edəcəyik, Bidzina İvanişvilidən və onun rejimindən azad olacağıq. Gəlin birlikdə olaq, sona qədər mübarizə - biz qalib gələcəyik. Qələbə qaçılmazdır. İndi baxıram, orada-burda (Tbilisidə) çoxlu polis qüvvəsi var, amma sizə bir şeyi deyim: onları bu gənclərdən ayırıb xəyanətkarların tərəfində qoyurlar; amma əminəm ki, onlar bizə əl qaldırmayacaqlar. Kimsə əl qaldırsa, peşman olacaq.
Biz bura dinc şəkildə gəlmişik və mütləq qalib gələcəyik, başqa yol yoxdur, hər şey yaxşı olacaq. Çıxın küçəyə, bütün Gürcüstan burada olmalıdır. Burada səhnə olacaq, burada bir bəyannamə oxuyacağıq, gürcü xalqı onu qəbul edəcək və o andan hakimiyyət xalqın əlində olacaq", - Burçuladze bildirib.
Xatırladaq ki, sentyabrın 4-də Gürcüstanda yerli hakimiyyət orqanlarına seçkilər keçirilir. Həmin gün müxalifət hökuməti dinc yolla devirmək məqsədi ilə Tbilisinin mərkəzində genişmiqyaslı etiraz aksiyası keçirməyi planlaşdırır. Gürcüstan hakimiyyəti etiraz aksiyasının təşkilatçılarına dəfələrlə xəbərdarlıq edib ki, pozuntulara görə qanunun ən yüksək həddi ilə cəzalandırılacaq.
Keçmiş prezident Mixail Saakaşvilinin yaratdığı Vahid Milli Hərəkat partiyasının keçmiş rəhbəri Levan Xabeişvili və digər partiya təmsilçisi, Tbilisi şəhər şurasının üzvü Zviad Kuprava hökumətin devrilməsinə çağırışlara görə həbs edilib.
