1 yaşından 65-ə varanda...

5 oktyabr 2025-ci il... Bu tarix sadəcə bir yubiley deyil. Bu gün həm Beynəlxalq Müəllimlər Günü, həm də Azərbaycanın ictimai-siyasi həyatında öz dəsti-xəttini yaradan ziyalılardan biri – Əziz Ələkbərlinin 65 illik yubileyidir. Bu iki tarixin eyni vaxta düşməsi təsadüfi deyil – çünki onun ömür yolu müəllimlikdən başlayır və bu missiya bu gün də davam edir: millətə öyrətmək, yaddaşı oyatmaq, Vətəni anlatmaq.
Əziz Yusif oğlu Ələkbərli 1960-cı ildə qədim Vedibasar mahalının Qaralar kəndində dünyaya göz açır. O torpağın daşına, suyuna, havasına hopmuş tarix, ağrı və qürur onun həyatına, düşüncəsinə, yaradıcılığına istiqamət verir. Doğma yurdun itkisi onun qəlbində milli yaddaşın bərpası kimi bir missiyaya çevrilir. Hər yazısında, hər çıxışında o torpağın səsi, o insanların həsrəti duyulur. Onun ömrü Vətən eşqinin yaşayan aynasıdır – bir ömürlük axtarış, bir ömürlük xidmət.
Azərbaycan Dövlət Universitetinin filologiya fakültəsini bitirdikdən sonra, Əziz Ələkbərli müəllimlik yoluna qədəm qoyur. Qax rayonunun Qum kəndində və doğma Qaralarda o, gənc ürəklərə dilin və sözün sehrini öyrədir. O, sadəcə dərs demir – düşünməyi, özünü tanımağı, yaddaşla yaşamağı öyrədir. Bu gün də o, hər çıxışında və hər yazısında bir müəllim kimi danışır – sözlə tərbiyə verir, həqiqətlə istiqamət göstərir.
Elmi fəaliyyətini 1988-ci ildən Azərbaycan Milli Elmlər Akademiyasında davam etdirən Əziz Ələkbərli hazırda AMEA Folklor İnstitutunun “Qərbi Azərbaycan folkloru” şöbəsinə rəhbərlik edir və xalq yaddaşının qorunması, unudulmuş dəyərlərin yenidən dirçəldilməsi istiqamətində çalışır. O, folkloru yalnız tədqiq etmir, xalq ruhunun daşıyıcısı kimi onu gələcək nəsillərə ötürür.
Mətbuat sahəsindəki fəaliyyəti də Əziz müəllimin həyatının ayrılmaz hissəsidir. 1991-ci ildən “Ana Vətən”, “Ağrıdağ”, “Vətən səsi” və “Xalq qəzeti” kimi nüfuzlu mətbu orqanlarda çalışaraq, o, sözün cəmiyyətə təsir gücünü sübut edir. Onun qələmi millət vicdanının ifadəsinə çevrilib. “Həsən bəy Zərdabi” və “Qızıl qələm” mükafatları da bu əməyin təbii nəticəsidir.
Əziz Ələkbərlinin elmi və ədəbi yaradıcılığı çoxşaxəlidir. 500-dən çox elmi və publisistik məqalə, 47 kitab – bu, bir insan ömrünə sığan nəhəng zəhmətin göstəricisidir. “Qədim Türk-Oğuz Yurdu – ‘Ermənistan’”, “Qərbi Azərbaycan abidələri”, “Qərbi Azərbaycanlıların 1988-ci il soyqırımı: Sənədlərin dili ilə”, “Qərbi Azərbaycan irsi” və 10 cildlik “Qərbi Azərbaycan Ensiklopediyası” kimi əsərləri bir xalqın yaddaş xəritəsini bərpa edir.
Hazırda Əziz Ələkbərli Qərbi Azərbaycan İcmasının İdarə Heyətinin sədri kimi yüz minlərlə soydaşımızın səsini dünyaya çatdırır. O, hər platformada Qərbi Azərbaycana qayıdış ideyasını qətiyyətlə səsləndirir, bu məsələnin siyasi və mənəvi əsaslarını elmi dəlillərlə təsbit edir.
Onun çıxışları sadəcə nitqlər deyil – bir millətin ümidinin səsi, haqqın carçısıdır.
Millət vəkili, alim, ziyalı və insan kimi Əziz Ələkbərli sadəliyi, səmimiliyi və təvazökarlığı ilə seçilən şəxsiyyətdir. Onunla görüşən hər kəs bir ağsaqqalın, bir dostun, bir müəllimin nurunu hiss edir. Onun üçün vəzifə yük yox, xidmət borcudur; və o, bu borcu səssiz, lakin əzmli şəkildə daşıyır.
Əziz müəllim “Tərəqqi” medalı, “Heydər Əliyevin 100 illiyi” və “Aşıq Ələsgər – 200” yubiley medalları ilə təltif olunub. Amma onun üçün ən böyük mükafat xalqın sevgisidir, insanların minnətdarlıqla səsləndirdiyi “Əziz müəllim” sözüdür.
Bu gün 65 yaşı tamam olan Əziz Ələkbərli yenə də eyni ruhla çalışır, yazır, yaradır. Onun qəlbində Qərbi Azərbaycanın küləyi, Vedibasarın nəfəsi, Vətənin çağırışı var. O, Qərbi Azərbaycan tarixinin və irsinin canlı ensiklopediyasıdır.
Onun ömrü tükənməyəcək – çünki bu ömür xalqın yaddaşına hopub.
Bu yubiley təkcə bir insanın deyil, bir ideyanın, bir amalın, bir Vətən sevgisinin bayramıdır.
Bu gün həm rəhbərimiz, həm qələm dostumuz, həm də qapısını ərklə açıb dərd-sərimizi bölüşdüyümüz, qardaş deyib yanında dayandığımız, böyük və şərəfli bir mücadilədə sərkərdəmiz olan Əziz Ələkbərliyə üz tutub deyirik:

Doğum gününüz mübarək olsun, Əziz müəllim!
Vətən eşqinin aynası olan ömrünüz Vətən kimi uca, xalq sevgisi kimi əbədi olsun!

Şəmsi Qoca
Səbuhi Hüseynov

• Vətən
• Eşq
• Əziz Ələkbərov
• 65