İsrailin Baş naziri Benyamin Netanyahu bildirib ki, Qəzzada saxlanılan bütün girovların “yaxın günlərdə” azad ediləcəyinə ümidlidir.

Leqal.info xəbər verir ki, bu barədə The Times of Israel yazıb.

O, ABŞ Prezidenti Donald Trampın Qəzza müharibəsinə son qoymağı hədəfləyən planının birinci mərhələsi çərçivəsində baş tutacaq danışıqlardan öncə nikbin olduğunu nümayiş etdirib.

Netanyahu qısa bildirib ki, İsrail çox böyük bir nailiyyətin astanasındadır və bu, ABŞ-ın vasitəçiliyi ilə irəliləyən planın mühüm mərhələsidir.

Netanyahu bunları da deyib: “Bu hələ yekun deyil. Biz bunun üzərində ciddi şəkildə işləyirik. Ümid edirəm ki, Tanrının köməyi ilə yaxın günlərdə, bütün girovların – həm sağ, həm də həlak olmuşların, bir anda geri qaytarıldığını elan edə biləcəyik. Bu zaman İsrail Müdafiə Qüvvələri (IDF) hələ də Qəzzanın dərinliklərində yerləşəcək”.

Netanyahu həmçinin qeyd edib ki, İsrailin danışıqlar qrupu Qahirəyə göndərilib və orada “girovların azad edilməsinin texniki detallarını” müəyyənləşdirəcək. Onun sözlərinə əsasən, həm Qüds, həm də Vaşinqton “bu danışıqların cəmi bir neçə gün davam etməsini” planlaşdırır.

O, razılaşmanın ikinci mərhələsində “HAMAS-ın silahsızlaşdırılacağını və Qəzza zolağının demilitarizasiya ediləcəyini” bildirib. Netanyahu xəbərdarlıq edib: “Bu, ya diplomatik yolla, Tramp planına uyğun şəkildə, ya da hərbi yolla – bizim tərəfimizdən həyata keçiriləcək.”

Leqal.info