70-dən çox beynəlxalq fəal Qəzzaya humanitar yardım apararkən saxlanılıb və Yunanıstana göndəriləcək...
İsrail hakimiyyəti “Sumud Flotiliyasının” heyət üzvləri arasında olan isveçli iqlim fəalı Qreta Tunberq və müxtəlif ölkələrdən olan təxminən 70 nəfəri ölkədən deportasiya etməyə hazırlaşır.
Poliqon xəbər verir ki,bu barədə France Press (AFP) agentliyi bir neçə Avropa hökumətinin məlumatlarına istinadən xəbər yayıb. Deportasiya prosesi bazar ertəsi həyata keçiriləcək.
Məlumata görə, saxlanılanların çoxu təyyarə ilə Yunanıstana göndəriləcək, oradan isə onlar öz ölkələrinə qayıda biləcəklər. Deportasiya olunacaq şəxslər arasında 28 Fransa vətəndaşı, 27 yunan, 15 italiyalı və 9 isveçli var. Qeyd olunur ki, şənbə günü 26 italiyalı artıq İsraili tərk edib, bazar günü isə 21 ispan vətəndaşı ayrıca reyslə vətənə qayıdıb. Bununla belə, 28 ispan və bir neçə digər ölkənin vətəndaşları hələ də İsraildə saxlanılır.
“Sumud Flotiliyasının” tərkibinə 45 gəmi daxil idi. Bu flotiliya İsrailin Qəzzaya tətbiq etdiyi blokadanı yarmaq və bölgəyə humanitar yardım çatdırmaq məqsədilə yola çıxmışdı. Qəzzada aclığın kəskinləşməsi fonunda həyata keçirilən bu təşəbbüs 1 oktyabrda İsrail hərbçiləri tərəfindən beynəlxalq sularda dayandırılıb. İsrail rəsmiləri həmin gün bəyan ediblər ki, 400-dən çox sərnişini olan gəmilərin Fələstin ərazisinə daxil olmasına icazə verilməyib.
AFP-nin məlumatına əsasən, İtaliyaya qayıdan bir neçə fəal mətbuata açıqlamasında bildirib ki, saxlanma zamanı İsrail hakimiyyət orqanları tərəfindən alçaldıcı münasibətə məruz qalıblar. Onların sözlərinə görə, İsrailin bu davranışı beynəlxalq humanitar hüququn və insan haqlarının pozulması kimi qiymətləndirilə bilər.
Hazırda Avropa ölkələrinin bir çoxu İsraildən saxlanılan şəxslərin tezliklə azad olunması və deportasiyanın şəffaf aparılması ilə bağlı izahat tələb edir. Diplomatik mənbələr bildirir ki, məsələ Aİ səviyyəsində də müzakirəyə çıxarıla bilər.
Poliqon.info
