Yer kürəsində təxminən hər səkkizinci insan qeyri-rəsmi yaşayış məntəqələrində yaşayır, 300 milyondan çox insanın isə ümumiyyətlə evi yoxdur.
"Unikal" BMT-nin saytına istinadla xəbər verir ki, bu barədə oktyabrın 6-da qeyd olunan Ümumdünya Habitat Günü münasibətilə Birləşmiş Millətlər Təşkilatında xatırladılıb.
Bu gün hər il oktyabr ayının ilk bazar ertəsi qeyd olunur. Məqsədi hər bir insanın layiq olduğu mənzil hüququna malik olmasını və şəhərlərin, eləcə də digər yaşayış məntəqələrinin inkişafının əhəmiyyətini dünyaya xatırlatmaqdır. Mənzillə bağlı problemlər təkcə inkişaf etməkdə olan ölkələrə aid deyil. Məsələn, ABŞ kimi varlı dövlətlərdə də bir çox gənc layiqli yaşayış yeri əldə etmək imkanından məhrumdur.
Bu il Habitat Günü “Böhranın aradan qaldırılması üzrə şəhər həlləri” mövzusu altında keçirilir. BMT bu il məcburi köçkünlük problemlərinə miqyaslı həll yolları tapmağa diqqət çəkir.
BMT-nin Baş katibi Antonio Quterreş bu gün münasibətilə yayımladığı müraciətdə bildirib: “Silahlı münaqişələr, siyasi qeyri-sabitlik və iqlim böhranı 123 milyon insanı öz evlərini tərk etməyə məcbur edib və onların əksəriyyəti artıq çətinliklərlə üzləşən şəhərlərdə və qəsəbələrdə sığınacaq axtarır”.
O vurğulayıb ki, məhz şəhərlər bu problemlərə səmərəli həll təklif edə bilərlər: “Şəhər sadəcə kərpicdən inşa edilmiş binalar deyil”.
Quterreş hər kəsin özünü təhlükəsiz və rahat hiss etdiyi daha dayanıqlı şəhərlərin yaradılması ilə bağlı çağırış da edib.
Ümumdünya Habitat Günü çərçivəsində BMT-nin Məskunlaşma Proqramının (UN-Habitat) Nayrobi şəhərində yerləşən mənzil-qərargahında bir sıra tədbirlər keçiriləcək. Bu tədbirlər səmərəli şəhər həllərinin təşviqinə, şəhər və ərazi planlaşdırmasının əhəmiyyətinə, inklüziv şəhər idarəçiliyinə, eləcə də məcburi köçkünlər üçün şəraitin yaxşılaşdırılmasında yerli hakimiyyət orqanlarının roluna həsr olunacaq.
Bundan əlavə, bu gün və sabah Cenevrədəki Millətlər Sarayında “Gələcəyi formalaşdıran şəhərlər” mövzusu altında BMT Merlər Forumunun beşinci görüşü keçiriləcək. Dünyanın müxtəlif ölkələrindən gəlmiş merlər təcrübə mübadiləsi aparacaq və şəhərlərin, eləcə də yerli idarəetmə orqanlarının dayanıqlı gələcəyin formalaşmasında oynadığı əsas rolu vurğulayan birgə tövsiyələr hazırlayacaqlar.
