Vaşinqton Qəzza zolağında atəşkəsin icrasını nəzarətdə saxlamaq üçün hərbi missiya təşkil edir...
ABŞ təxminən 200 hərbçini İsrailə göndərərək Qəzza zolağında atəşkəsin tətbiqi və monitorinqi üzrə dəstək göstərəcək.
Poliqon xəbər verir ki, bu barədə Associated Press agentliyi etibarlı mənbələrə istinadla məlumat yayıb.
Məlumata görə, İsraildə “hərbi-vətəndaş koordinasiya mərkəzi” yaradılacaq. Bu mərkəz humanitar yardımların paylanmasını tənzimləyəcək, eləcə də logistika və təhlükəsizlik dəstəyini təmin edəcək.
Missiyada ABŞ-ın tərəfdaş ölkələrinin hərbçiləri ilə yanaşı, özəl təşkilatların nümayəndələri də iştirak edəcək. Reuters agentliyinin məlumatına görə, missiyada Misir, Qatar, Türkiyə və BƏƏ hərbçiləri də iştirak edə bilər.
Xatırladaq ki, 9 oktyabr gecəsi ABŞ prezidenti Donald Tramp açıqlayıb ki, İsrail və HƏMAS sülh planının birinci mərhələsi üzrə razılığa gəlib. Bu mərhələ girovların azad olunmasını və İsrail qoşunlarının razılaşdırılmış xəttə geri çəkilməsini nəzərdə tutur.
Ekspertlər bildirirlər ki, ABŞ-ın hərbi iştirakının məqsədi atəşkəsin dayanıqlı olmasını təmin etmək, humanitar yardımların vaxtında çatdırılmasını və tərəflər arasında etimadın formalaşmasını dəstəkləməkdir.
Poliqon.info
