Böyük Britaniya Ermənistan və Azərbaycana silah embarqosunu ləğv edir.
Publika.az xəbər verir ki, bu barədə Böyük Britaniyanın Avropa və Şimali Amerika üzrə dövlət naziri Stiven Douti İcmalar Palatasının saytında məlumat verib.
Nazir bu qərarı avqustun 8-də Vaşinqtonda Ermənistan-Azərbaycan münasibətlərinin normallaşması istiqamətində əldə olunan irəliləyiş, eləcə də ATƏT-in Minsk qrupunun buraxılması ilə izah edib.
"Böyük Britaniya hökuməti Ermənistan və Azərbaycanla münasibətlərini strateji tərəfdaşlığa yüksəltmək qərarına gəlib. Bu tərəfdaşlıq ticarət, təhlükəsizlik və müdafiə kimi sahələrdə əməkdaşlığı əhatə edəcək və nazirlərin illik görüşləri ilə gücləndiriləcək", - Douti bildirib.
O, avqustun sonunda Ermənistan və Azərbaycana səfərlərini xatırladıb və deyib ki, hər iki ölkənin liderləri ilə “Cənubi Qafqazda sabitliyin və təhlükəsizliyin möhkəmləndirilməsi üzrə praktiki tədbirləri” müzakirə edib.
