ABŞ prezidenti Donald Tramp 2025-ci ilin avqustunda Hindistanın baş naziri Narendra Modi ilə görüşündə Hindistanın Rusiyadan neft almasını dayandıracağına söz verdiyini iddia edib. Lakin Hindistan rəsmiləri Rusiya ilə enerji ticarətinin davam edəcəyini vurğulayaraq, Trampın açıqlamalarını təkzib ediblər.
"Hindistanın Rusiyadan neft almasından narahat oldum. Modi mənə dedi ki, bir daha Rusiyadan neft almayacaqlar. Bu, əhəmiyyətli bir addımdır. İndi Çini də eyni şeyi etməyə razı salmalıyam" – deyə Tramp bildirib.
Hindistanın Rusiyadan neft idxalını əsas gətirən Tramp avqustun əvvəlində idxal olunan məhsullara əlavə 25 faiz rüsum tətbiq edərək, ümumi vergi dərəcəsini 50 faizə çatdırıb.
Xatırladaq ki, sentyabrın əvvəlində Hindistanın maliyyə naziri Nirmala Sitharaman ölkəsinin Rusiyadan neft almağa davam edəcəyini bəyan edib. Hindistan Biznes Assosiasiyasının prezidenti Sammy Kotvani də Rusiyadan neft idxalının əhəmiyyətli dərəcədə azalmayacağını vurğulayıb.
“Bloomberg”in sentyabrın sonunda yazıb ki, ABŞ İran və Venesuelaya qarşı sanksiyaları ləğv edərsə, Hindistan Rusiyadan neft alışını azaltmağa hazırdır. Lakin bu şərtlər yerinə yetirilmədikcə, Rusiya ilə enerji ticarətinin davam edəcəyi bildirilib.
Rusiya prezidenti Vladimir Putin isə 2 oktyabr Hindistanın Rusiyadan enerji idxalını dayandırmasının 9-10 milyard dollar itki ilə nəticələnəcəyini bildirib: "ABŞ-ın yüksək rüsumları Hindistana da eyni zərəri verəcək. Bəs niyə imtina etsən?"
Kreml rəsmiləri ABŞ-ın Rusiya ilə ticarəti dayandırmaq çağırışlarını isə “qanunsuz təhdid” kimi qiymətləndirib.
TAHİR
