Vaşinqtonun təzyiqləri fonunda Hindistan enerji tədarükündə dönüş nöqtəsi yaşayır...
Poliqon xəbər verir ki, Hindistan son aylarda Rusiyadan neft idxalını əhəmiyyətli dərəcədə azaldıb. Bu barədə “Reuters” agentliyi Ağ Evin nümayəndəsinə istinadla məlumat yayıb. Bildirilir ki, ABŞ administrasiyası Hindistanın Rusiya neftinə olan asılılığını azaltmasını ticarət sazişlərinin bağlanması üçün əsas şərtlərdən biri kimi irəli sürüb.
Mənbələrin verdiyi məlumata görə, ABŞ Hindistanla ticarət danışıqları zamanı Rusiyadan neft alışının məhdudlaşdırılmasını tələb edib. Vaşinqton hesab edir ki, bu addım həm geosiyasi sabitlik, həm də enerji bazarlarında balansın qorunması baxımından vacibdir. Hindistan isə bu təzyiqlər fonunda sentyabr ayında Rusiyadan gündəlik neft idxalını 1,61 milyon barelə qədər endirib. Halbuki avqust ayında bu göstərici 1,72 milyon barel idi. İllik ifadədə bu, təxminən 16%-lik azalma deməkdir.
Bununla yanaşı, ABŞ Prezidenti Donald Tramp Hindistana Rusiyadan neft aldığına görə 25%-lik əlavə rüsum tətbiq edib. Yeni Delhi üçün bu rüsumların ümumi həcmi 50%-ə çatıb. Bu da Hindistanın enerji siyasətində yeni istiqamətə yönəlməsinə səbəb olub. Hazırda Hindistan neft tədarükünü daha çox Yaxın Şərq və ABŞ bazarlarından təmin etməyə çalışır.
Ekspertlər hesab edirlər ki, bu dəyişiklik Hindistanın beynəlxalq ticarət münasibətlərində daha çevik mövqe tutmasına və ABŞ ilə strateji tərəfdaşlığını gücləndirməsinə xidmət edir. Eyni zamanda, bu addım Rusiya üçün enerji ixracında yeni bazar axtarışlarını zəruri edir.
Poliqon.info
