Paris prokuroru hadisəni “tarixi itki” adlandırıb...
Poliqon xəbər verir ki, Paris prokuroru Lora Bekko “RTL” radiostansiyasına açıqlamasında Luvr muzeyində baş vermiş silahlı oğurluq nəticəsində dəymiş maddi zərərin 88 milyon avro təşkil etdiyini bildirib. Onun sözlərinə görə, bu rəqəm kifayət qədər böyük olsa da, muzeyə vurulan tarixi və mədəni zərərin miqyası ilə müqayisə etmək mümkün deyil.
Bekko qeyd edib ki, oğruların ələ keçirdikləri zinət əşyalarını əridərək satmaqla eyni dəyərdə məbləğ əldə etmələri real görünmür. “Bu cür əşyaların bənzərsiz tarixi dəyəri var, onları sadəcə metalla eyniləşdirmək mümkün deyil,” — deyə o vurğulayıb.
Prokurorun açıqlamasına görə, hadisə ilə bağlı istintaq davam edir və təxminən 100 müstəntiq araşdırmaya cəlb olunub. Məlum olub ki, muzeyə dörd nəfər silahlı şəxs daxil olub, lakin istintaq zamanı onların arxasında dayanan və əməliyyatın planlaşdırılmasında iştirak edən digər şəxslərin də olması istisna edilmir.
Luvr rəhbərliyi isə hadisəni “Fransanın mədəni irsinə qarşı ciddi hücum” kimi qiymətləndirib və oğurlanan eksponatların qaytarılması üçün beynəlxalq əməkdaşlıq başladıldığını bildirib.
Poliqon.info
