Vaşinqton sülhə nail olmaq imkanı varsa, dialoqa açıq qalacağını bildirir...
ABŞ dövlət katibi Marko Rubbio Vaşinqtonun hələ də Rusiya ilə yüksək səviyyəli görüş keçirmək niyyətində olduğunu bəyan edib.
Poliqon xəbər verir ki, bu barədə The Economic Times nəşri məlumat yayıb.
Rubbionun sözlərinə görə, o, Rusiya xarici işlər naziri Sergey Lavrovla “yaxşı və konstruktiv” telefon danışığı aparıb.
“Biz bu söhbətin nəticələri əsasında işi davam etdirəcəyik”, deyə dövlət katibi bildirib.
Rubbio əlavə edib ki, ABŞ həmişə diplomatik əlaqələrə və dialoqa açıqdır, xüsusilə də sülhün əldə olunması üçün real imkan yarandıqda.
Qeyd edək ki, daha əvvəl Polşa jurnalisti və beynəlxalq münasibətlər üzrə ekspert, Vroçlav Universitetinin tədqiqatçısı Maqdalena Qurnitska-Partıka bildirmişdi ki, ABŞ prezidenti Donald Trampın Budapeştdə Rusiya lideri Vladimir Putinlə görüşünü ləğv etməsinin arxasında məhz Marko Rubbio dayanıb.
Xatırladaq ki, 23 oktyabrda Donald Tramp Rusiya prezidenti ilə Budapeştdə nəzərdə tutulan görüşün ləğv olunduğunu açıqlayıb. Daha öncə CNN yazmışdı ki, Lavrovla Rubbio arasında baş tutan telefon danışığından sonra ABŞ rəsmiləri Rusiyanın mövqeyinin əvvəlki “maksimalist tələblər” çərçivəsində qaldığı qənaətinə gəliblər.
Ekspertlər hesab edirlər ki, Vaşinqtonun diplomatik kanalları açıq saxlamaq istəyi, ABŞ administrasiyasının Rusiya ilə münasibətlərdə gərginliyi idarə etmək və gələcək danışıqlara zəmin yaratmaq cəhdinin göstəricisidir.
Poliqon.info
