Mornine adlı robot müştəriləri qarşılayır, avtomobilləri təqdim edir və texniki xüsusiyyətləri izah edir...
Çində Mornine adlı yeni nəsil insanabənzər robot təqdim olunub. O, avtomobil satıcısı kimi fəaliyyət göstərmək, müştəriləri qarşılamaq, söhbət aparmaq və avtomobillərin texniki göstəriciləri barədə ətraflı məlumat vermək qabiliyyətinə malikdir.
Poliqon xəbər verir ki, bu barədə Interesting Engineering nəşri məlumat yayıb.
Robotun təqdimatı 2025-ci il oktyabrın 20-də Anxoy əyalətinin Uxu şəhərində keçirilən AiMOGA Global Business Conference tədbirində baş tutub. Tədbirdə 30-dan çox ölkənin nümayəndələri iştirak edib. Mornine layihəsi AiMOGA Robotics platforması əsasında, Çin avtomobil istehsalçısı Chery Automobile şirkətinin dəstəyi ilə hazırlanıb. Şirkət avtomobil texnologiyalarını süni intellektlə birləşdirərək “ağıllı satıcı” konsepsiyasını həyata keçirməyi qarşısına məqsəd qoyub.
Robot avtomobil qapısını müstəqil şəkildə aça, daxili sistemləri nümayiş etdirə və maşının funksiyalarını izah edə bilir. Bunun üçün o, tam bədən hərəkət sistemi, möhkəmləndirici öyrənmə (reinforcement learning) üsulu və çoxsaylı sensorlardan ibarət idarəetmə mexanizmi ilə təchiz olunub. Bu, Mornine-a insan davranışına bənzər hərəkətlər etməyə imkan verir.
Bundan başqa, robot bir neçə dildə ünsiyyət qurur, avtomobilləri təqdim edir, təqdimatlar keçirir və avtomobil sərgilərində və ya diler mərkəzlərində işləmək üçün nəzərdə tutulub. Hazırlayıcılar bildirirlər ki, məqsəd sadəcə robot nümayiş etdirmək deyil, müştəri ilə texnologiya arasında yeni qarşılıqlı əlaqə təcrübəsi yaratmaqdır — yəni robot təkcə “reklamçı” deyil, həm də real məsləhətçi rolunda çıxış edir.
Bu təşəbbüs Çinin avtomobil sənayesində daha geniş tendensiyanın bir hissəsidir. Bir çox yerli şirkətlər süni intellekt, sensor texnologiyaları və kompüter görməsi kimi avtomobil texnologiyalarını humanoid robotların inkişafında da tətbiq etməyi planlaşdırır. Chery şirkətinin planına görə, Mornine layihəsi üç mərhələdə həyata keçiriləcək: ilkin mərhələdə — salon məsləhətçisi kimi, sonrakı mərhələdə — sərgilərdə təqdimatçı, gələcəkdə isə — məişət və xidmət sahəsində yardımçı robot kimi fəaliyyət göstərəcək.
Poliqon.info
