Şəki Apellyasiya Məhkəməsində talama məqsədi olmadan qanunsuz olaraq avtomobil ələ keçirmədə təqsirləndirilən İlkin Hacıyevin (adı, soyadı şərtidir) barəsindəki hökmdən verilən apellyasiya şikayəti üzrə məhkəmə iclası yekunlaşıb.
Pravda.az-ın əldə etdiyi məlumata görə, hakim Akif Eyvazovun sədrliyi ilə keçirilən prosesdə qərar elan olunub.
Qərara əsasən, təqsirləndirilən şəxsin apellyasiya şikayəti qismən təmin edilib. Ucar Rayon Məhkəməsinin hökmü onun zərərçəkmiş Mahir Yusifova (adı, soyadı şərtidir) 11000 manat məbləğində maddi ziyan vurması hissəsində dəyişdirilib. İxtiyar Tahirov zərərçəkmiş şəxsə vurduğu maddi ziyan 8230 manat müəyyən edilib.
İttihama görə, hadisə 4 mart 2024-cü il tarixdə, saat 14 radələrində Ucar şəhərindəki avtoyuma məntəqəsində qeydə alınıb.
Belə ki, İlkin Hacıyev işlədiyi avtoyuma məntəqəsində olarkən həmyerlisi tərəfindən yuyulması üçün gətirilmiş, zərərçəkmiş Mahir Yusifova məxsus “Mercedes-Benz E 220 CDI” markalı avtomobili talama məqsədi olmadan qanunsuz ələ keçirib. O, sürücünün avtomobilin açarlarını üzərində qoyub getməsindən istifadə edərək mühərriki işə salıb nəqliyyat vasitəsini avtoyuma məntəqəsinin ərazisindən kənara çıxararaq Ucar şəhəri, Heydər Əliyev prospekti istiqamətində idarə edib. Təqsirləndirilən şəxs maşını idarə etdiyi zaman ehtiyatsızlıq nəticəsində idarəetməni itirərək nəqliyyat vasitəsini yol kənarındakı divara çırpıb. Nəticədə avtomobilin arxa oturacağında əyləşmiş şəxs müxtəlif bədən xəsarətləri alıb.
Hadisə nəticəsində Mahir Yusifova məxsus avtomobilə 11 000 manat məbləğində maddi ziyan dəyib.
Hadisədən sonra İlkin Hacıyev saxlanılaraq cinayət məsuliyyətinə cəlb edilib.
Ucar Rayon Məhkəməsinin 1 il 11 ay 28 gün müddətə azadlıqdan məhrum edilib və təqsirləndirilən şəxs məhkəmə iclas zalından dərhal həbs alınıb.
Kamal Məmmədov
