Mübahisə Putinin danışıqlara hazır olub-olmaması məsələsi ətrafında kəskinləşib...
Poliqon xəbər verir ki, ABŞ kəşfiyyat orqanları arasında Ukrayna müharibəsinin taleyi və Rusiyanın mövqeyi ilə bağlı fikir ayrılığı yenidən gündəmə gəlib. The Wall Street Journal yazır ki, bu dəfə ziddiyyətlər Vladimir Putinin sülh danışıqlarına nə dərəcədə hazır olması məsələsində yaranıb.
Mənbələrin bildirdiyinə görə, Mərkəzi Kəşfiyyat İdarəsi (CİA) Kreml tərəfdən müəyyən yumşalma və danışıqlara “imkan pəncərəsi” görür. Lakin ABŞ Dövlət Departamentinin Kəşfiyyat və Araşdırmalar Bürosu (INR) tam əks mövqedə dayanır və hesab edir ki, Rusiya real kompromisə hazır deyil.
Agentliklər arasındakı bu fikir ayrılığı prezidentin gündəlik məxfi brifinqinə qədər çatıb. Ardınca INR-də bir neçə analitik “struktur dəyişiklikləri” bəhanəsi ilə vəzifədən uzaqlaşdırılıb. Keçmiş rəsmi şəxslər bunu “təhlükəli tendensiya” adlandıraraq, administrasiyanın kəşfiyyat məlumatlarını siyasi xəttə uyğunlaşdırmaq cəhdindən narahat olduqlarını bildiriblər.
Qəzet qeyd edir ki, CİA, Dövlət Departamenti və Ağ Ev arasında bu cür münaqişələr əvvəllər də baş verib, lakin Rusiya ətrafında hazırkı fikir ayrılığı müharibənin başlanğıcından bəri ən ciddi böhran hesab olunur. INR analitikləri vurğulayırlar ki, Putin hələ də maksimalist məqsədlərini qoruyur və güzəştə getmək niyyətində deyil, CİA isə münaqişənin diplomatik həlli üçün müəyyən fürsət görür.
Keçmiş ABŞ rəsmiləri xəbərdarlıq edirlər ki, kəşfiyyatın siyasi məqsədlərə tabe etdirilməsi reallığın təhrifinə və strateji səhvlərə gətirib çıxara bilər.
Poliqon.info
