Terapevt Lyudmila Lapa RT-yə açıqlamasında bildirib ki, payız aylarında yaranan yuxululuqla mübarizədə ən vacib məsələ düzgün yuxu cədvəlinin yaradılmasıdır.
Doğru.az xəbər verir ki, həkimin sözlərinə görə, axşam saat doqquzda yatıb səkkiz saatlıq yuxunu təmin etmək orqanizmin gümrah oyanmasına kömək edir.
“Axşam doqquzda yatıb səkkiz saat yatsan, səhər şən, enerjili və işə hazır oyanarsan. Ardınca yüngül idman, isti səhər yeməyi və bir az kofein qəbul etmək faydalıdır”, – Lapa məsləhət görüb.
Onun sözlərinə görə, bir çox insan gec yatıb tez oyanır və bu da orqanizmin istirahətini pozur:
“Altı saat yuxu kifayət deyil. Ən dərin və bərpaedici yuxu saat doqquzla gecə yarısı arasındadır. Lakin çoxları işdən gec qayıdıb, ağır şam yeməyindən sonra yatdığından səhər enerjisi çatmır.”
Həkim əlavə edib ki, insan sağlam həyat tərzi keçirsə, amma yuxululuq davam edirsə, mütləq həkimə müraciət etməlidir.
“Yuxululuğun səbəblərinə günəşin azlığı və boz hava daxildir, amma əsas məsələ daxili bioloji vəziyyətimizdir,” – deyə Lapa yekunlaşdırıb.
DOĞRU.AZ
