ABŞ-ın Apple şirkəti 2025-ci ilin iyul-sentyabr dövrünə (3-cü rüb) aid maliyyə hesabatlarını açıqlayıb.
Marja xəbər verir ki, maliyyə təqviminə görə 27 sentyabrda başa çatan 3 aylıq dövrü dördüncü rüb kimi qəbul edən Apple-ın hesabatına əsasən, şirkətin xalis satışları bu dövrdə illik 8 faiz artaraq 102,5 milyard dollar təşkil edib. Apple-ın xalis satışları ötən ilin eyni dövründə 94,9 milyard dollar olaraq qeydə alınmışdı.
Şirkətin xalis mənfəəti eyni dövrdə 86 faiz artaraq 27,5 milyard dollara yüksəlib. Apple ötən ilin eyni dövründə 14,7 milyard dollar mənfəət açıqlamışdı.
Şirkətin bir səhmə düşən mənfəəti isə bu dövrdə 97 sentdən 1,85 dollara yüksəlib.
iPhone satışları artıb
Bu dövrdə Apple-ın iPhone və Mac satışlarında artım müşahidə olunarkən, iPad satışları sabit səviyyəyə yaxın bir göstərici göstərib.
iPhone satışlarının məbləği iyul-sentyabr dövründə illik 6 faiz artaraq 49 milyard dollara yüksəlib. Eyni dövrdə Mac satışları 13 faiz artaraq 8,7 milyard dollar təşkil edib, iPad satışlarının məbləği isə 6,9 milyard dollar olub.
Apple-ın baş direktoru Tim Kuk şirkətin maliyyə nəticələrinə dair qiymətləndirməsində həmin rübdə rekord gəlir əldə olunduğunu bildirib.
