BAKI, 2 noyabr. TELEQRAF
ABŞ prezidenti Co Baydenin 2024-cü ildə koronavirusa yoluxması onun siyasi taleyini dəyişən hadisələrdən biri olub.
Teleqraf xəbər verir ki, bu barədə jurnalist Conatan Karl Baydenin müşavirinin sözlərinə istinadən “Qisas: Donald Tramp və Amerikanı dəyişən kampaniya” adlı kitabında yazıb.
Bildirilib ki, 2024-cü ilin iyulunda Bayden seçki kampaniyasının qızğın vaxtında prezidentliyə namizədliyini geri çəkdiyini açıqlayıb. Bundan bir qədər əvvəl onun koronavirusa yoluxduğu və sağlamlığında, xüsusilə idrak funksiyalarında problemlər yarandığı bildirilmişdi.
Müşavir bildirib: “Tanrı bizə müəyyən siqnallar göndərirdi, sonra isə ona sillə vurdu – COVID-ə yoluxdurdu”.
Karl qeyd edib ki, Bayden xəstə olduğu üçün namizədliyini geri çəkmə qərarını televiziya vasitəsilə elan etməyib:
“Onun komanda üzvləri yazılı bəyanat yaymaq və bir neçə gün sonra xalqa müraciət etmək qərarına gəldilər”.
Baydenin yarışdan çəkilməsindən sonra onun yerinə vitse-prezident Kamala Harris Demokratlar Partiyasının namizədi kimi seçkilərdə iştirak edib, lakin Donald Trampa məğlub olub.
