İspaniya və Yunanıstan iqtisadiyyatda Şimali Avropanı geridə qoyub...
Poliqon xəbər verir ki, Avropada uzun illərdir hökm sürən iqtisadi balans dəyişməyə başlayıb. Semafor nəşrinin məlumatına görə, bu dəfə cənub ölkələri, xüsusilə İspaniya və Yunanıstan şimaldakı iqtisadi nəhəngləri geridə qoyur. Uzun illər “problemlilər” siyahısında olan bu ölkələr indi böyümə tempinə və maliyyə intizamına görə Avropanın yeni liderlərinə çevrilirlər.
İspaniya iqtisadiyyatı bu il 3,5%, Yunanıstan isə 2,3% artım nümayiş etdirib. Müqayisə üçün, Fransada bu göstərici cəmi 0,7%, Almaniyada isə 0,2% olub. Bu arada, şimal ölkələrində büdcə kəsiri artmaqda davam edir (baxmayaraq ki, başlanğıc səviyyə aşağı idi), cənubda isə əksinə, azalır.
Mütəxəssislər hesab edirlər ki, cənubun uğuru əsasən iki faktora söykənir: güclü turizm axını və sərmayə cəlb etmək üçün görülən məqsədyönlü tədbirlər. Məsələn, Yunanıstan və Kiprdə turizmin təsiri ilə tikinti sektoru partlayışlı inkişaf yaşayır. Bundan əlavə, İspaniya kimi ölkələr illər əvvəl həyata keçirilən qənaət siyasətinin nəticələrini indi görür.
Şimal ölkələri isə siyasi müqavimət və ictimai narazılıq səbəbindən xərclərin azaldılması planlarını həyata keçirməkdə çətinlik çəkir. Böyük Britaniyada hökumət əlillik ödənişlərinin azaldılması planından imtina edib. Fransada isə bir il ərzində üç fərqli hökumət dəyişib — hər biri büdcə ixtisarları səbəbilə etirazlarla üzləşib.
Beləliklə, Avropada “iqtisadi mərkəz”in tarixi dəyişməsi müşahidə olunur: cənub tədricən yeni sabitlik və inkişaf modelinə çevrilir, şimal isə siyasi və fiskal təzyiqlərlə mübarizə aparır.
Poliqon.info
