ABŞ prezidenti Ayzekmanın kosmosa olan marağını və “Polaris Dawn” missiyasındakı təcrübəsini vurğulayıb...
Poliqon xəbər verir ki, ABŞ prezidenti Donald Tramp biznesmen və qeyri-peşəkar astronavt Cared Ayzekmanın NASA rəhbəri postuna yenidən namizədliyini irəli sürüb. Prezident bu barədə özünün Truth Social sosial platformasında bəyanat yayıb.
Tramp bildirib ki, Ayzekmanın “kosmosa olan dərin marağı və şəxsi təcrübəsi” onu bu vəzifə üçün ideal namizədə çevirir. Qeyd edilib ki, Ayzekman “Polaris Dawn” adlı kommersiya missiyası çərçivəsində açıq kosmosa çıxış etmişdi. Dövlət başçısı həmçinin NASA-nın hazırkı icraçı direktoru Şon Daffiyə gördüyü işlərə görə təşəkkürünü ifadə edib.
Bu, Trampın Ayzekmanı NASA rəhbəri təyin etməyə ikinci cəhdidir. 2025-ci ilin aprelində Senat komitəsi onun namizədliyini təsdiqləmişdi, lakin elə həmin ilin mayında Tramp gözlənilmədən bu qərarı geri çəkmişdi.
SpaceX şirkəti ilə əməkdaşlıq edən Cared Ayzekman, İlon Maskın yaxın çevrəsinə daxil olan şəxslərdən sayılır. Tramp və Mask arasında bir müddət gərgin münasibətlər yaşansa da, payızda əlaqələr normallaşmışdı. Oktyabrın sonunda Donald Tramp “keçmiş fikir ayrılıqlarına baxmayaraq, İlon Maskla münasibətlərinin yaxşı olduğunu” bəyan etmişdi.
Poliqon.info
