Ses qazeti saytına istinadən ain.az xəbər verir.
8 Noyabr Zəfər Günü Azərbaycan tarixində ən parlaq və qürurverici səhifələrdən biridir. Bu gün Azərbaycan xalqının illərlə həsrətini çəkdiyi torpaqların azad edildiyi, ədalətin bərpa olunduğu, milli birliyin və vətən sevgisinin təntənə etdiyi bir gündür. 2020-ci il noyabrın 8-də Azərbaycan Ordusu Müzəffər Ali Baş Komandan İlham Əliyevin rəhbərliyi altında Şuşa şəhərini işğaldan azad etməklə Vətən müharibəsində həlledici qələbə qazandı və bununla da 30 ilə yaxın davam edən Qarabağ həsrətinə son qoyuldu.
Zəfər Günü təkcə hərbi uğurun deyil, həm də milli ruhun, xalqın əzmkarlığının və birliyinin simvoludur. 44 günlük Vətən müharibəsi dövründə Azərbaycan xalqı “Dəmir yumruq” kimi birləşərək öz torpaqlarını azad etmək əzmini bütün dünyaya nümayiş etdirdi. Hər bir azərbaycanlı bu mübarizədə öz payını verdi döyüş meydanında qəhrəmanlıq göstərən əsgərlər, arxa cəbhədə çalışan və xalqın ordusuna dayaq olan vətəndaşlar bir məqsəd uğrunda birləşdilər. Bu birliyin nəticəsində Azərbaycan tarixi ədaləti bərpa etdi və ərazi bütövlüyünü təmin etdi.
Şuşanın azadlığı təkcə strateji deyil, həm də mənəvi baxımdan böyük əhəmiyyət daşıyırdı. Çünki Şuşa Azərbaycanın mədəniyyət beşiyi, musiqi və ədəbiyyatın paytaxtı sayılır. Bu şəhərin azad edilməsi xalqın milli kimliyinin bərpası, keçmişə və köklərə qayıdış demək idi. Şuşanın azadlığı ilə bütün Azərbaycan sanki yenidən dirçəldi, qüruru və ləyaqəti bərpa olundu.
Bu gün Zəfər Günü hər bir azərbaycanlı üçün qürur və fəxarət bayramıdır. Bu gün biz şəhidlərimizin müqəddəs xatirəsini dərin ehtiramla yad edir, qazilərimizin fədakarlığını minnətdarlıqla xatırlayırıq. Onların sayəsində bu torpaqlarda sülh və təhlükəsizlik bərqərar olub, gələcək nəsillər azad və güclü Azərbaycanda yaşamaq imkanı qazanıblar.
Zəfər Günü bizə həm də bir dərs verir vətəni sevmək, onu qorumaq və inkişaf etdirmək hər bir vətəndaşın borcudur. Bu gün qazanılmış zəfəri qorumaq, azad edilmiş torpaqlarda həyatın bərpasına töhfə vermək, şəhidlərimizin qanı ilə suvarılmış torpaqları çiçəkləndirmək bizim müqəddəs vəzifəmizdir.
Azərbaycan xalqı Zəfər Gününü hər il böyük qürurla qeyd edir. Bu gün yalnız keçmişin qəhrəmanlıq səhifələrini yada salmaq deyil, həm də gələcəyə inamla baxmaq günüdür. 8 Noyabr Zəfər Günü xalqımızın birliyinin, gücünün və sarsılmaz iradəsinin rəmzi olaraq daim tariximizin qızıl hərflərlə yazılmış səhifəsi kimi qalacaq.
Nəzifə Allahverdiyeva
YAP Ağcabədi rayon təşkilatının gənc fəalı
Hadisənin gedişatını izləmək üçün ain.az saytında ən son yeniliklərə baxın.
