Rusiyalı deputat Aleksey Juravlyov Rusiyanın Venesuelaya "Oreshnik" raketləri göndərəbiləcəyini açıqlayıb. Dövlət Dumasının Müdafiə Komitəsi sədrinin birinci müavini Juravlyov Rusiyanın hazırda Venesuelaya silah tədarük etdiyini və "Oreshnik" raket sisteminin göndərilməsində də heç bir maneə olmadığını bildirib.
"Rusiya Venesuelanın əsas hərbi-texniki tərəfdaşlarından biridir. Bu ölkəni kiçik silahlardan tutmuş təyyarələrə qədər, demək olar ki, bütün silah çeşidi ilə təchiz edirik. Rusiyanın Su-30MK2 qırıcı təyyarələri Venesuela Hərbi Hava Qüvvələrinin onurğasını təşkil edir və onu regionun ən güclü hava qüvvələrindən birinə çevirir. Bir neçə S-300VM (Antey-2500) batalyonunun tədarükü ölkənin vacib obyektlərini hava hücumlarından qorumaq qabiliyyətini əhəmiyyətli dərəcədə gücləndirib. Son məlumatlara görə, Rusiyanın Pantsir-S1 və Buk-M2E sistemləri bu yaxınlarda İl-76 nəqliyyat təyyarələri ilə Karakasa çatdırılıb" – deyə Juravlyov bildirib.
Rusiyalı parlamentari Venesuelanın ən yeni silahlarla təchiz edilməsində də heç bir maneə olmadığını bildirib: "Rusiyadan göndərilən silahların miqdarı və dəqiq adları haqqında məlumat məxfi saxlanıldığı üçün amerikalılar bəzi sürprizlərlə qarşılaşa bilərlər. Dost ölkəyə "Oreshnik" və ya sınaqdan keçirilmiş "Kalibr" raketləri kimi yeni silahların tədarükündə də heç bir maneə görmürəm. Ən azından Rusiyanın bunu etməsinə mane olan heç bir beynəlxalq öhdəlik yoxdur".
TAHİR
