Idman.biz saytına istinadən ain.az xəbər verir.
Ağdamın “Qarabağ” komandası müasir futbolda mümkünsüz heç nə olmadığını bir daha sübut edərək, azarkeşlərin qəlbini fəth etməkdə davam edir.
İdman.Biz xəbər verir, Çempionlar Liqasının dördüncü turunda “Çelsi” ilə ev oyununda qeydə alınan 2:2 hesablı heç-heçə göstərdi ki, belə ulduzlarla dolu komandalar qarşısında da təşəbbüsü ələ almaq və nəticə qazanmaq mümkündür. Ağdam təmsilçisi elə inamlı təsir bağışladı ki, sanki Avropa futbolunda yeni standartlar müəyyən edən klub məhz odur. Bu səbəbdən “Qarabağ”ın oyunlarını izləmək həqiqi zövq verir.
Dumanlı Albion təmsilçiləri ilə qarşılaşmaların özünəməxsus statusu var. İngiltərə Premyer Liqası həmişə yüksək standartlar müəyyən edib və futbolun intensivliyi baxımından xeyli fərqlənir. Elə buna görə də oyundan əvvəl Qurban Qurbanov “Qarabağ”ın nəticədən asılı olmayaraq qalib sayılacağını demişdi. Çünki “Çelsi” kimi komandaların səfəri təkcə bir klub üçün yox, bütövlükdə ölkə futbolu üçün stimuldur.
Bununla razılaşmamaq çətindir. Axı cəmi səkkiz il əvvəl, ağdamlılar ilk dəfə Çempionlar Liqasının əsas mərhələsinə vəsiqə qazandıqda, onların qrupdakı rəqiblərindən biri məhz “zadəganlar” idi. Həmin vaxt londonlular “Qarabağ”ı 6:0 və 4:0 hesabı ilə məğlub etmişdilər. Ümumiyyətlə, “Çelsi”nin Azərbaycan paytaxtına səfərləri xoş xatirələrlə yadda qalıb - xüsusilə də 2019-cu ildə Avropa Liqasının finalında qazandıqları qələbə sayəsində. İndi isə komanda dünya klublar çempionatının qalibi kimi Bakıya gəlmişdi və görünür, asan qələbə gözləyirdi.
Lakin londonluların bu titulları meydan sahiblərini qorxutmadı. Əksinə, “Qarabağ” rəqibini onun silahı ilə vurmağa başladı - pressinq tətbiq etdi. Artıq ilk hissədə Azərbaycan çempionu hesabı bərabərləşdirməklə kifayətlənmədi, Marko Yankoviçin dəqiq yerinə yetirdiyi penalti ilə irəli keçdi. Komandanın ilk qolu isə əsl estetik zövq bəxş etdi: Kamilo Duran rəqib müdafiəçidən topu qaparaq hücumu sürətləndirdi və topu dirəyə vurdu, qapı qarşısına çatan Leandro Andrade isə epizodu sona çatdıraraq topu tora göndərdi.
Fasilədən sonra meydana əvəzləmədən daxil olan Alexandro Qarnaconun səyləri ilə “Çelsi” bərabərlik qolunu vurdu. Ancaq Qurban Qurbanov yenidən taktiki çevikliyini göstərdi. O, rəqibin meydanında pressinqin intensivliyini azaltdı, amma “Qarabağ” yenə də londonlular üçün təhlükə yaratmaqda davam etdi. Xüsusilə Aleksey Kaşukun yaxşı fürsəti oldu - o, Nariman Axundzadənin cinah ötürməsini tamamladı, lakin zərbəsi birbaşa qapıçının üzərinə tuş gəldi.
Nəticədə 2:2 hesabı “Qarabağ” üçün əla nəticə oldu. Komanda yenidən xarakter, iradə və əzmkarlıq nümayiş etdirərək göstərdi ki, Çempionlar Liqasında artıq avtoritetlərdən çəkinməyən, özünəməxsus oyun üslubuna malik bir komanda parlayır. 2017-ci ildə - “Qarabağ”ın Çempionlar Liqasındakı debüt mövsümündə “Çelsi” ilə ilk görüşündən bəri komanda böyük yol qət edib. Qurban Qurbanov da futbolçularının bu inkişafını xüsusi vurğuladı:
“Müəyyən uğurlar əldə etmək üçün böyük çətinliklərdən keçmək lazımdır. Əgər biz bu sınaqları adlayırıq və bunun fərqinə varırıqsa, deməli, işimizi daha məsuliyyətlə və keyfiyyətlə yerinə yetirəcəyik. Ona görə də mən həmişə deyirəm ki, bu cür oyunlar bizi daha yetkin edir. Ola bilər, 2017-ci ilin heyəti fərdi baxımdan daha güclü idi, amma indi bizdə təcrübə artıb. Həm klub, həm də baş məşqçi kimi işə daha soyuqqanlı və inamla yanaşıram. Bəzən belə rəqiblərlə matçlarda mütləq risk etmək lazımdır ki, futbolçular özlərinə inansınlar”, - deyə “Qarabağ”ın baş məşqçisi fikirlərini bölüşüb.
Azərbaycan çempionu ilk dəfə İngiltərə klubundan xal alaraq böyük uğura imza atdı və turnir cədvəlində 7 xalla 15-ci pillədə qərarlaşdı. Növbəti turda ağdamlılar səfərdə “Napoli” ilə qarşılaşacaq. Oyun noyabrın 25-də keçiriləcək. Pley-off mərhələsinə vəsiqə uğrunda mübarizə isə artıq tam reallığa çevrilir.
Zəki Feyzullayev
İdman.Biz
Ən son xəbərləri və yenilikləri almaq üçün ain.az saytını izləyin.
