Yeniavaz portalından verilən məlumata görə, ain.az xəbər yayır.
Argentinalı futbolçu Dieqo Maradonanın ölümü ilə bağlı iş üzrə dinləmələrin bərpası 2026-cı il martın 17-nə təyin edilib.
Yeniavaz.com xəbər verir ki, bu barədə “La Nacion” qəzeti məhkəmənin qərarına istinadla məlumat yayıb.
Məlumata görə, məhkəmə Maradonanı müalicə edən həkim Leopoldo Lukenin müdafiə tərəfinin vəsatətini rədd edib.
Qeyd edək ki, mayın sonunda Maradonanın ölüm işinə baxan məhkəmə, sənədli filmlə bağlı mübahisələrə görə hakim Xulyeta Makintaçın vəzifədən kənarlaşdırılmasından sonra dinləmələrdə əldə edilən irəliləyişi etibarsız hesab edib. İddialara görə, hakim çəkiliş qrupuna qeyri-qanuni olaraq iclaslarda iştirak etməyə icazə verib. Nəticədə, iclaslar dayandırılıb və işə əvvəldən baxmaq üçün yeni hakimlər kollegiyası təyin edilib.
Xatırladaq ki, 2022-ci ilin iyununda Baş Prokurorluq Luke də daxil olmaqla səkkiz tibb işçisinə qarşı ağırlaşdırılmış adam öldürmə ittihamı irəli sürüb. Onları 8 ildən 25 ilə qədər həbs cəzası gözləyir. İlk hakimlər kollegiyasının iştirakı ilə iş üzrə dinləmələr 2025-ci ilin martında başlayıb. Prokurorlar əsas diqqəti futbolçunun 25 noyabr 2020-ci ildə vəfat etdiyi evdə müalicəsi zamanı baş verən hadisələrə yönəldib. O, başından əməliyyat olunduqdan sonra 11 noyabr 2020-ci ildən orada olub. Prokurorların Maradonanın evinə gələnlərdən əldə etdiyi ifadələrə görə, onun qaldığı yer ağır əməliyyatdan sonra qulluq üçün standartlara cavab verməyib.
Maradona 2020-ci ilin noyabrında 61 yaşında vəfat edib. Ölümün səbəbi ağciyər ödeminə səbəb olan kəskin ürək çatışmazlığı olub.
Sonrakı hadisələr barədə daha çox məlumat almaq üçün ain.az saytını izləyin.
