Bizimyol portalından verilən məlumata görə, ain.az xəbər yayır.
Azərbaycan və ümumilikdə Şərq cəmiyyətlərində kişilərin bədən forması barədə gözləntilər qadınlarla müqayisədə daha az tənqid edilir. “Kişidə qarın eyib deyil”, “kişinin köklüyü varlılıq əlamətidir” kimi ifadələr tarixi olaraq kişi statusunu qüvvə, sabitlik və rifahla əlaqələndirib. “Evin balkonu” bənzətməsi də bu fikrin zarafat tonunda ifadəsidir. Sanki qarın kişini "ağırbaşlı", “rahat yaşayan” və “savadlı ailə başçısı” kimi göstərir. Lakin bu yanaşma, müasir dövrdə həm sağlamlıq, həm də psixoloji özünüdərk baxımından ciddi problemlərə yol açır.
Tibbi baxımdan qarın piylənməsi bədən üçün ən təhlükəli piy növü sayılır. Bu, daxili orqanlar ətrafında yığılır və bir sıra ciddi xəstəliklərin riskini artırır: Ürək-damar xəstəlikləri, qan təzyiqinin yüksəlməsi, diabet, qaraciyər yağlanması, hormon balanssızlığı və s.
Yəni “kişidə qarın eyib deyil” fikri, faktiki olaraq insanı xəstəliklərə haqq qazandırmağa sövq edir. Bu düşüncə nəticəsində bir çox kişi sağlam qidalanma və idman vərdişlərini ikinci plana atır, bunun da nəticəsi həm fiziki, həm də psixoloji problemlər olur. Bu ifadə eyni zamanda gender stereotiplərinin bir nümunəsidir. Cəmiyyətdə qadının bədənindən “gözəllik”, kişinin bədənindən isə “qüvvə və ehtiyac yoxdur” kimi fərqli gözləntilər var. Halbuki sağlamlıq və baxımlılıq cinsə görə fərqlənməməlidir. “Kişidə qarın eyib deyil” kimi fikirlər kişi üçün öz bədəninə biganəlik mədəniyyətini formalaşdırır. Halbuki, sağlam bədən yalnız estetik deyil, həm də özünə hörmətin və məsuliyyətin göstəricisidir. Belə stereotiplər həm də qadın-kişi münasibətlərində balanssızlıq yaradır. Qadınlardan daim gözəl və fit qalmaq tələb olunur, kişilər isə eyni səviyyədə özlərini qorumağa təşviq edilmir.
“Kişidə qarın evin balkonu kimidir” ifadəsi, çox zaman şəxsin öz sağlamlıq məsuliyyətini gizlətmək üçün istifadə olunur. Yəni, kişi qarın artımını “yaşın gətirdiyi hal” kimi qəbul edir, özünü dəyişməyə ehtiyac görmür. Bu, komfort zonasına alışma və özünü inkar davranışıdır. Psixoloji baxımdan bu, insanın passivləşməsinə, həyat enerjisinin azalmasına və stresslə mübarizə bacarığının zəifləməsinə gətirib çıxarır. Cəmiyyətin bu kimi köhnə inanclardan uzaqlaşması vacibdir. Sağlamlıq, bədən forması və həyat tərzi zarafatla yox, şüurlu seçimlə idarə edilməlidir.
Əsl kişi olmaq qarın saxlamaq deyil, öz bədəninə, ailəsinə və gələcəyinə məsuliyyətlə yanaşmaqdır. Bədəninə diqqət edən kişi zəif deyil, əksinə, sağlam, güclü və balanslı həyat tərzinə sahib insandır.
Leyla Mirzə, Bizimyol.info
Daha ətraflı məlumat və yeniliklər üçün ain.az saytını izləyin.
