Türkiyənin Enerji və Təbii Sərvətlər naziri Alparslan Bayraktar Sinop və Trakyada planlaşdırılan nüvə elektrik stansiyası layihələri istiqamətində əhəmiyyətli addım atıb.
Hafta.az-ın yazdığına görə, Kanadada yerləşən AtkinsRealis şirkəti ilə yeni nüvə elektrik stansiyalarının tikintisi üçün texniki tədqiqatlara başlamaq barədə razılıq əldə edilib.
Daha əvvəl Akkuyu AES-i inşa edən Rusiyanın “Rosatom” şirkəti ilə bu stansiyalar üçün danışıqların aparıldığı açıqlanmışdı.
Nazir Bayraktar sosial mediada dünyanın aparıcı nüvə enerjisi şirkətləri ilə müzakirələri davam etdirdiklərini bildirib. Bayraktar AtkinsRealis-in baş direktoru İan L. Edvards və onu müşayiət edən nümayəndə heyəti ilə görüşdüyünü bildirib. "Biz əməkdaşlıq imkanlarını və Sinop və Trakyada tikməyi planlaşdırdığımız nüvə elektrik stansiyaları üçün CANDU texnologiyasının mümkünlüyünü müzakirə etdik. Texniki tədqiqatlara başlamaq üçün qarşılıqlı razılığa gəldik", - deyə Bayraktar bildirib.
2025-ci il Türkiyənin nüvə enerjisi yol xəritəsi üçün həlledici il olacaq. Hökumət bu il Sinop və Trakyada nüvə elektrik stansiyası layihələri ilə bağlı yekun qərarlar qəbul etməyi və layihələrin icrasına başlamağı hədəfləyir. Bu prosesdə Rusiyanın nüvə enerjisi sahəsindəki təcrübəsinin vacibliyi vurğulanır.
Türkiyə həmçinin hazırda Mersində tikilməkdə olan ölkənin ilk nüvə elektrik stansiyası olan Akkuyu Atom Elektrik Stansiyasının ilk enerji blokunu istismara verməyə hazırlaşır. Dörd blokdan ibarət stansiyanın hər biri 1200 meqavat enerji istehsal edəcək. Akkuyu layihəsi qlobal nüvə sənayesində "Tikinti-Sahiblik-İdarəetmə" modeli çərçivəsində həyata keçirilən ilk layihədir.
