Fransızların böyük əksəriyyəti prezident Emmanuel Makronun iki prezidentlik müddətinin ilkin nəticələrini uğursuz sayır və onun 2027-ci ildə səlahiyyətləri başa çatdıqdan sonra ölkənin siyasi həyatında iştirak etməsini istəmir. Bu barədə “Le Figaro” qəzetinin sifarişi ilə “Odoxa” şirkəti tərəfindən keçirilən ictimai rəy sorğusunun nəticələri göstərir.
Sorğu 5–6 noyabr tarixlərində, 1000 yetkin fransız arasında aparılıb.
Sorğuda iştirak edənlərin 89%-i Makronun siyasətini “uğursuz” adlandırıb. Onların arasında 2017 və ya 2022-ci il seçkilərində ona səs vermişlərin 77%-i də var. Ən çox mənfi təsir fransızların alıcılıq qabiliyyətinə (88%), pensiya sisteminə (86%), miqrasiya vəziyyətinə (85%) və əmək bazarına (73%) dəyib.
Respondentlərin 86%-i hesab edir ki, dövlət başçısı əhəmiyyətli siyasi irs qoymayacaq və onun “siyasi məktəbi” prezidentlik dövrünün sonu ilə birlikdə yox olacaq.
Keçmişdə Makron konstitusiyanın ardıcıl üçüncü dəfə namizədliyini irəli sürməyə qadağa qoymasından narazılığını bildirmiş və 2032-ci ildə yenidən prezidentliyə namizəd olmaq imkanını öyrəndiyi barədə məlumatlar yayılmışdı.
Lakin respondentlərin 89%-i “səhifəni çevirmək istədiklərini” və Makronun ölkə siyasətində mühüm rol oynamasını arzulamadıqlarını bildirib.
“Makronizm”in mümkün varisləri arasında sorğu iştirakçıları keçmiş baş nazir və prezident partiyasının rəhbəri Qabriel Attalı ən real namizəd hesab etsələr də, yalnız 39%-i onun “Makronun siyasi xəttini davam etdirəcəyinə” inanır.
